ନନ୍ଦପୁର : କୋରାପୁଟ ଜିଲା ନନ୍ଦପୁର ବ୍ଲକ ଅନ୍ତର୍ଗତ କୁଲାବିର ପଞ୍ଚାୟତ ସଦରମହକୁମା କୁଲାବିର ଗାଁରେ ଶନିବାର ଅପରାହ୍ଣରେ ଏକ ଅଭାବନୀୟ ଘଟଣା ଘଟିଛି । ସର୍ଟ ସର୍କିଟରୁ ନିଆଁ ବ୍ୟାପି ଗ୍ୟାସ ସିଲିଣ୍ଡର ଫାଟିବାରୁ ଦୁଇଭାଇଙ୍କ ଘର ଜଳି ପାଉଁଶ ହୋଇଯାଇଛି । ଘରେ ଥିବା ଗ୍ୟାସ ସିଲିଣ୍ଡର ଫାଟି ଦୁଇ ଘରର ସମସ୍ତ ଜିନିଷପତ୍ର ପୋଡି ପାଉଁଶ ହୋଇଛି। ଅଗ୍ନିକାଣ୍ଡ ଦେଖି କୁଲାବିର ଗ୍ରାମବାସୀ ଭୟଭୀତ ହୋଇ ପଡ଼ିଥିଲେ। ଜଳୁଥିବା ଘର ନିକଟକୁ କେହି ଯିବାକୁ ସାହସ କରି ନ ଥିଲେ । ଦୁଇ ଘର ଜଳି ଉଠିଥିଲା । ନନ୍ଦପୁର ଅଗ୍ନିଶମ ବାହିନୀ ଓ ପାଡୁଆ ପୁଲିସ କର୍ମଚାରୀ ପହଞ୍ଚି ନିଆଁକୁ ଆୟତ କରିଥିଲେ। ଏହି ଗାଁର ଦୁଇଭାଇ ସୁରେନ୍ଦ୍ର ଖିଲ ଓ ଉତ୍ତମ ଖିଲଙ୍କ ପରିବାର ଲୋକଙ୍କ ପିନ୍ଧାଲୁଗାକୁ ଛାଡ଼ି ଘରର ସମସ୍ତ ଜିନିଷପତ୍ର ନଷ୍ଟ ହୋଇଛି । ଦୁଇ ପରିବାର ନିଜର ସର୍ବସ୍ବ ହରାଇଥିବା ଅଭିଯୋଗ ହୋଇଛି । ଗ୍ୟାସ ସିଲିଣ୍ଡର ଫାଟି ଦୁଇ ଭାଇଙ୍କ ଘରକାନ୍ଥ ଭାଙ୍ଗି ନଷ୍ଟ ହୋଇଛି। ଛପର ତଳେ ପଡିଥିବା ସମସ୍ତ ଟାଇଲ ଭାଙ୍ଗି ଚୁରମାର ହୋଇଛି । କ୍ଷତିଗ୍ରସ୍ତ ଗରିବ ଶ୍ରେଣୀର ପରିବାରକୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀ ଅନୁରୋଧ କରିଛନ୍ତି । ପାଡୁଆ ରାଜସ୍ବ ନିରୀକ୍ଷକ ଅକ୍ଷୟ କୁମାର କ୍ଷତ୍ରୀଙ୍କୁ କୁଲାବିର ଗ୍ରାମକୁ ଯାଇ କ୍ଷୟକ୍ଷତିର ଆକଳନ କରି ରିପୋର୍ଟ ପ୍ରଦାନ କରିବାକୁ ନନ୍ଦପୁର ତହସିଲଦାର ନରସିଂହ ଗାଦବା ନିର୍ଦେଶ ଦେଇଛନ୍ତି।
Comments are closed.