ବ୍ରାହ୍ମସମାଜର ପ୍ରତିଷ୍ଠାତା ରାଜା ରାମମୋହନ ରାୟ ୧୭୭୨ ମେ ୨୨ରେ ବଙ୍ଗପ୍ରଦେଶର ରାଧାନଗରରେ ଜନ୍ମଗ୍ରହଣ କରିଥିଲେ। ପିଲାଦିନୁ ପାଠପଢ଼ାରେ ଆଗୁଆ ଥିବା ରାମମୋହନ ନିଜ ଆଗ୍ରହ ବଳରେ ମାତୃଭାଷା ସହିତ ସଂସ୍କୃତ, ପାର୍ସୀ, ଗ୍ରୀକ୍ ଓ ଇଂରାଜୀ ଭାଷାରେ ପାରଦର୍ଶିତା ଲାଭ କରିଥିଲେ। ବେଦ ଓ ବୈଦିକ ଅଧ୍ୟୟନ କରିବା ପରେ େସ ହୃଦୟଙ୍ଗମ କଲେ ଯେ ଭାରତୀୟ ସାମାଜିକ ଜୀବନଶୈଳୀରେ କୁସଂସ୍କାର ଓ ଅନ୍ଧବିଶ୍ବାସକୁ କେଉଁକାଳରୁ ପ୍ରଶୟ ଦିଆଯାଇଆସୁଛି। ଭାରତୀୟ ବୈଦିକ ସଂସ୍କୃତିର ପୁନଃଉତ୍ଥାନ ପାଇଁ ସେ ସଂସ୍କୃତ ବେଦକୁ ନିଜ ମାତୃଭାଷାରେ ଅନୁବାଦ କରିଥିଲେ। ରାଜନୈତିକ,ସାମାଜିକ ଓ ଧର୍ମକ୍ଷେତ୍ରରେ ରାମମୋହନ ବହୁବିଧ ସଂସ୍କାର ଆଣିଛନ୍ତି। ଜଣେ ସମାଜ ସଂସ୍କାରକ ଭାବରେ ତାଙ୍କ ଭୂମିକା ଖୁବ୍ ଗୁରୁତ୍ୱପୂର୍ଣ୍ଣ ଥିଲା। ଭାରତରେ ମୂଲ୍ୟହୀନ ଓ ଅସାମାଜିକ ପରମ୍ପରାଗୁଡ଼ିକ ଉଚ୍ଛେଦ ବା ଅଗ୍ରାହ୍ୟ କରିବାକୁ ସେ ବିଟ୍ରିଶ ସରକାରଙ୍କର ସାହାଯ୍ୟ ନେଇଥିଲେ। ତାଙ୍କ ଚେଷ୍ଟାରେ ୧୮୨୯ରେ ସତୀଦାହ ପ୍ରଥା ଉଚ୍ଛେଦ ହେଲା। ଜାତିପ୍ରଥାକୁ ସେ ବିରୋଧ କରିବା ସହ ନାରୀ ସ୍ୱାଧୀନତା ଏବଂ ନାରୀଶିକ୍ଷା ଉପରେ ଗୁରୁତ୍ୱ ଦେଇଥିଲେ। ବାଲ୍ୟବିବାହ ଓ ବହୁବିବାହ ଆଦି ଘୃଣ୍ୟ ପ୍ରଥାକୁ ସେ ଉଚ୍ଛେଦ କରିଥିଲେ। ୧୮୩୩ ସେପ୍ଟେମ୍ବର ୨୭ରେ ତାଙ୍କର ଦେହାନ୍ତ ହୋଇଥିଲା।
Comments are closed.