ଭୁବନେଶ୍ବର:ଓଡିଶା ବରିଷ୍ଠ ପୁଲିସ ଅଧିକାରୀ ମହିଳା ସଂଘ ତରଫରୁ ତୁଳସୀପୁରସ୍ଥିତ ପରିବାର କଲ୍ୟାଣ କେନ୍ଦ୍ର ଠାରେ ଆତ୍ମରକ୍ଷା ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି। ଏହି ଶିବିରରେ ୫୬ ଜଣ ଛାତ୍ରଛାତ୍ରୀ ଅଂଶଗ୍ରହଣ କରି ଆତ୍ମରକ୍ଷା କୌଶଳ ଶିକ୍ଷାଲାଭ କରିଥିଲେ। ୧୨ ଜଣ ପ୍ରଶିକ୍ଷକ ସେମାନଙ୍କୁ ଆତ୍ମରକ୍ଷା କୌଶଳ ସମ୍ପର୍କରେ ତାଲିମ ପ୍ରଦାନ କରିଥିଲେ।
ଛାତ୍ର ଛାତ୍ରୀଙ୍କୁ ମାନସିକ ସ୍ତରରେ ଦୃଢ, ସଶକ୍ତ ଏବଂ ଯେକୌଣସି ଆସନ୍ନ ବିପଦରୁ ସେମାନଙ୍କୁ ରକ୍ଷା କରିବାରେ ଏହି ତାଲିମ ବେଶ ସହାୟକ ହେବ ବୋଲି ଶିବିରରେ ଯୋଗ ଦେଇଥିବା ଅତିଥିମାନେ ମତପ୍ରକାଶ କରିଥିଲେ। ଏହି ଶିବିରରେ ସଭାପତି ଅନୁ ବଂଶଲ, ସମ୍ପାଦିକା ସୋନାଲୀ ମହାନ୍ତି, କୋଷାଧ୍ୟକ୍ଷା ଲାରା ମିଶ୍ର, ସଦସ୍ୟା ଗୀତା ପାଣିଗ୍ରାହୀ, ମାଧୁରୀ ସିଂ ଏବଂ ତୁଳସୀପୁର ପରିବାର କଲ୍ୟାଣ କେନ୍ଦ୍ରର ସମ୍ପାଦିକା ସବିତା ପରିଡା ପ୍ରମୁଖ ଉପସ୍ଥିତ ଥିଲେ।
