ପ୍ରଯୁକ୍ତି ବିଦ୍ୟା​‌ ନବାଚାର ଓ କଲ୍ୟାଣକାରୀ ଯୋଜନା ବିଶ୍ୱ ପାଇଁ ପ୍ରେରଣାଦାୟୀ : ବିଲ ଗେଟ୍ସ

ନୂଆଦିଲ୍ଲୀ : ଭାରତରେ ପ୍ରଯୁକ୍ତି ବିଦ୍ୟା​‌ କ୍ଷେତ୍ରରେ ହେଉଥିବା ନବାଚାର ଓ ସରକାରଙ୍କ କଲ୍ୟାଣକାରୀ ଯୋଜନା ଗୁଡିକ ସାରା ବିଶ୍ୱ ପାଇଁ ପ୍ରେରଣାଦାୟୀ ବୋଲି ମାଇକ୍ରୋସଫ୍ଟର ପ୍ରତିଷ୍ଠାତା ତଥା ଗେଟସ୍ ଫାଉଣ୍ଡେସନର ମୁଖ୍ୟ ବିଲ ଗେଟ୍ସ କହିଛନ୍ତି । ଭାରତର ବିକାଶ ପାଇଁ ପ୍ରଧାନମନ୍ତ୍ରୀ କରୁଥିବା ବିଭିନ୍ନ କାର୍ଯ୍ୟକୁ ମଧ୍ୟ ସେ ଉଚ୍ଚ ପ୍ରଶଂସା କରିଛନ୍ତି । ଶନିବାର ଦିନ ବିଲ ଗେଟ୍ସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନୂଆଦିଲ୍ଲୀରେ ସାକ୍ଷାତ କରିଛନ୍ତି । ପ୍ରଧାନମନ୍ତ୍ରୀ ମୋଦୀ ଟ୍ୱିଟ କରି ଏହି ସୂଚନା ଦେଇଛନ୍ତି ।
ପ୍ରଧାନମନ୍ତ୍ରୀ ଟ୍ୱିଟ କରି କହିଛନ୍ତି ଯେ ବିଲ ଗେଟ୍ସଙ୍କୁ ସାକ୍ଷାତ କରି ସେ ବେଶ ଆନନ୍ଦିତ। ବିଭିନ୍ନ ପ୍ରସଙ୍ଗରେ ଉଭୟଙ୍କ ମଧ୍ୟରେ ବିସ୍ତୃତ ଭାବେ ଆଲୋଚନା ହୋଇହେଲା ବୋଲି ଶ୍ରୀ ମୋଦୀ କହିଛନ୍ତି ।

Delighted to meet @BillGates and have extensive discussions on key issues. His humility and passion to create a better as well as more sustainable planet are clearly visible. https://t.co/SYfOZpKwx8 pic.twitter.com/PsoDpx3vRG

— Narendra Modi (@narendramodi) March 4, 2023

ଅନ୍ୟ ପକ୍ଷରେ ଗେଟ୍ସ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବା ପରେ ନିଜର ଖୁସି ବ୍ୟକ୍ତ କରିବାକୁ ଯାଇ ଏକ ବ୍ଲଗ ପୋଷ୍ଟ କରିଛନ୍ତି । ଭାରତରେ ପ୍ରଯୁକ୍ତି ବିଦ୍ୟା​‌ କ୍ଷେତ୍ରରେ ହେଉଥିବା ନବାଚାର ଓ ସରକାରଙ୍କ କଲ୍ୟାଣକାରୀ ଯୋଜନା ଗୁଡିକ ସାରା ବିଶ୍ୱ ପାଇଁ ପ୍ରେରଣାଦାୟୀ ବୋଲି ବିଲ ଗେଟ୍ସ ଉଲ୍ଲେଖ କରିଛନ୍ତି । କୋଭିଡ ଟିକା ପ୍ରସ୍ତୁତି, ଏହାର ବିତରଣ ପାଇଁ କୋୱିନ ପ୍ଲାଟଫର୍ମ ସହିତ କେନ୍ଦ୍ର ସରକାରଙ୍କ ଗତି ଶକ୍ତି ଯୋଜନାକୁ ସେ ଭୂୟସୀ ପ୍ରଶଂସା କରିଛନ୍ତି। ଜଳବାୟୁ ପରିବର୍ତନ ଭଳି ବୈଶ୍ୱିକ ଆହ୍ୱାନର ମୁକାବିଲା କରିବା ପାଇଁ ଭାରତ ଯେଉଁ ଗତିରେ ଅଗ୍ରସର ହେଉଛି ତାକୁ ମଧ୍ୟ ସେ ପ୍ରଶଂସା କରିଛନ୍ତି।