ନର୍ଲା : ଶୁକ୍ରବାର ସକାଳୁ ଗାଈ ଚରେଇବା ପାଇଁ ନର୍ଲା ବ୍ଲକ ଅନ୍ତର୍ଗତ ଘୋଡାବନ୍ଧ ପଞ୍ଚାୟତର ଯୋଡାବନ୍ଧ ଗାଁର ୫ ଜଣ ବ୍ୟକ୍ତି ସାନ୍ଦୁଲ ନଦୀ ଆର ପଠା ଉଲିକୁପାକୁ ଯାଇଥିଲେ । ଅପରାହ୍ନରେ ଗାଈଗୋଠ ନେଇ ଘରକୁ ଫେରୁଥିବା ସମୟରେ ନଦୀ ମଝିରେ ଥିବା ବେଳେ ବନ୍ୟାଜଳ ଆକସ୍ମିକ ବୃଦ୍ଧି ପାଇଥିଲା ।
ତେବେ ଗାଈଗୋଠ କୌଣସି ମତେ ନିଜ ଗାଁ ପଟ ନଦୀ ପଠାକୁ ଆସିଥିଲେ ଓ ଏହା ସହ ଅନ୍ୟ ୪ ଜଣ ଥବିର ଗଡତିଆ,ହେମନ୍ତ ଗଡତିଆ, ବିଜୁ ଗଡତିଆ ଓ ମନୋଜ ମାଝୀ ବହୁ କଷ୍ଟରେ ନଦୀ ପାର ହୋଇ ଗାଁ ପଟକୁ ଆସିଥିଲେ । ହେଲେ ସବା ପଛରେ ଥିବା ସାନନ୍ଦ ଗଡତିଆ (୭୫) ନଦୀର ପ୍ରଖର ସ୍ରୋତରେ ପଡି ଯିବା ଫଳରେ ନଦୀରେ ଭାସି ଯାଇଥିଲେ । ଅନ୍ୟମାନଙ୍କୁ ନଦୀ ପାର କରେଇବାକୁ ଯାଇ ପଛରେ ରହିଥିଲେ ବୃଦ୍ଧ । ସେତେବେଳକୁ ନଦୀରେ ପ୍ରବଳ ବନ୍ୟାଜଳ ବୃଦ୍ଧି ପାଇଥିଲା । ଗାଁ ଲୋକେ ସେ ଭାସିଯାଇଥିବା ଜାଣି ପାରି ଖୋଜାଖୋଜି କରିଥିଲେ ହେଁ ନିଖୋଜ ସାନନ୍ଦଙ୍କ ପତ୍ତା ମିଳିପାରିନାହିଁ ।
ଲୋକେ ଓଡ୍ରାଫ କୁ ଯୋଗାଯୋଗ କରିଥିଲେହେଁ ଅଗ୍ନିଶମ ଟିମ୍ ବହୁ ବିଳମ୍ବରେ ସନ୍ଧ୍ୟାହେବାପରେ ଘଟଣାସ୍ଥଳରେ ପହଞ୍ଚି ଥିବା ସ୍ଥାନୀୟ ଲୋକ ପ୍ରକାଶ କରିଛନ୍ତି । ଏହାକୁ ନର୍ଲା ବ୍ଲକ ପୂର୍ବତନ ଅଧ୍ୟକ୍ଷ ଗଭୀର ନିନ୍ଦା କରିଛନ୍ତି । ଓଡ୍ରଫ୍ ଟିମ୍ ଅନ୍ଧାର ହେବା ପୂର୍ବରୁ ପହଞ୍ଚି ଥିଲେ କିଛି କରା ଯାଇ ପାରିଥାନ୍ତା ବୋଲି ଯୋଡାବନ୍ଧ ଗ୍ରମବାସୀ ଅଭିଯୋଗ କରିଛନ୍ତି । ରାତି ହୋଇଯିବାରୁ ଖବର ଲେଖା ହେବା ପର୍ଯ୍ୟନ୍ତ ଓଡ୍ରାଫ୍ ଟିମ୍ କୌଣସି ଉଦ୍ଧାର କାର୍ଯ୍ୟ କରିପାରି ନଥିବା ସୂଚନା ମିଳିଛି ।
