ଫୁଲୁଛି ମହାନଦୀ; ବନ୍ୟା ଆଶଙ୍କା

ହରଭଙ୍ଗା: ଲଘୁଚାପ ଜନିତ ଲଗାଣ ବର୍ଷା ପ୍ରଭାବରେ ଦୁଇଦିନ ଧରି ଉପରମୁଣ୍ଡରେ ଅବିଶ୍ରାନ୍ତ ବର୍ଷା ଯୋଗୁଁ ସୋମବାରଠାରୁ ମହାନଦୀରେ ଜଳସ୍ତର ଅହେତୁକଭାବେ ବୃଦ୍ଧି ପାଇବାରେ ଲାଗିଛି। ମହାନଦୀରେ ବନ୍ୟାଜଳ ବୃଦ୍ଧି ପାଇବା ସହିତ ବୌଦ୍ଧ ଜିଲ୍ଲାର ତଳମୁଣ୍ଡରେ ବନ୍ୟା ଆଶଙ୍କା ଦେଖାଦେଇଛି। ଫଳରେ ହରଭଙ୍ଗା ତହସିଲର ୫୫ଟି ରାଜସ୍ୱ ଗ୍ରାମ ବନ୍ୟା ପ୍ରଭାବିତ ଆଶଙ୍କା କରାଯାଉଛି। ବର୍ତମାନ ମହାନଦୀର ଉଛୁଳା ବନ୍ୟାପାଣି ହରଭଙ୍ଗା ବ୍ଲକର ଶାକୁସିଙ୍ଗା ନାଳ ଉପରେ ଚାଲିବା ଫଳରେ ହରଭଙ୍ଗା-ଧଳପୁର ଜଗନ୍ନାଥ ସଡକରେ ଯୋଗାଯୋଗ ବିଛିନ୍ନ ରହିଛି। ବୁଢିକଣ-କଙ୍କଲା ଜଗନ୍ନାଥ ସଡକରେ ବନ୍ୟାପାଣି ଯୋଗୁଁ ଏହି ରାସ୍ତାରେ ଯୋଗାଯୋଗ ବିଛିନ୍ନ ରହିଛି। ଏହା ସହିତ ପରଗଳପୁର-ପଲଶାପାଟ୍ଟ ରାସ୍ତାରେ ବନ୍ୟାଜଳ ଯୋଗୁଁ ଏହି ରାସ୍ତାରେ ଯୋଗା ଯୋଗ ବିଛିନ୍ନ ରହିଛି। କୁଶଙ୍ଗ ବନ୍ୟପ୍ରାଣୀ ଅଭୟାରଣ୍ୟ ମଧ୍ୟରେ ରହିଥିବା ଉଦଣ୍ଡି ନାଳରେ ମହାନଦୀର ବନ୍ୟାପାଣି ଯୋଗୁଁ ମାରଡା ଗାଁକୁ ଯୋଗାଯୋଗ ବିଛିନ୍ନ ହୋଇଛି। ଫଳରେ ମାରଡା ଗ୍ରାମର ୨୫ ଆଦିବାସୀ ପରିବାର ପାଣିଘେରରେ ଭୋକଉପାସରେ ରହିଛନ୍ତି। ତୁରନ୍ତ ଜିଲ୍ଲାପ୍ରଶାସନ ପକ୍ଷରୁ ପାଣିଘେରରେ ଥିବା ଗାଁ ଲୋକଙ୍କୁ ଶୁଖିଲା ଖାଦ୍ୟ ଯୋଗାଇଦେବାକୁ ଦାବୀ ହେଉଛି।