ଭୁବନେଶ୍ବର: ମହାପ୍ରଭୁ ଶ୍ରୀଲିଙ୍ଗରାଜଙ୍କ ମନ୍ଦିରରେ ପୁଣି ଅବ୍ୟବସ୍ଥା। ନିକଟରେ ଫଟୋ ଉଠାକୁ କେନ୍ଦ୍ର କରି ବିବାଦ ଦେଖା ଦେଇଥିବାବେଳେ ଶୁକ୍ରବାର ସୁରକ୍ଷା ଢିଲା ଯୋଗୁଁ ଆଉ ଏକ ଅଘଟଣ ଘଟିଛି। ଜନୈକ ବିଦେଶୀ ଅଣହିନ୍ଦୁ ପର୍ୟ୍ୟଟକ ମନ୍ଦିର ଭିତରକୁ ପ୍ରବେଶ କରିବା ଯୋଗୁଁ ଦିଅଁଙ୍କ ବେଶ ଓ ଭୋଗ ମାରା େହବା ସହ ନୀତିକାନ୍ତିରେ ବିଳମ୍ବ ହୋଇଥିଲା। ଶ୍ରୀଲିଙ୍ଗରାଜ ମନ୍ଦିରରେ ବାରମ୍ବାର ଏଭଳି ଅବ୍ୟବସ୍ଥା ହେଉଥିବାରୁ ଶ୍ରଦ୍ଧାଳୁମହଲରେ ଅସନ୍ତୋଷ ଦେଖା ଦେଇଛି। ପୁଲିସ ଓ ମନ୍ଦିର ପ୍ରଶାସନ ପକ୍ଷରୁ ଅବହେଳା ଯୋଗୁଁଁ ଆଜି ଜଣେ ଅଣହିନ୍ଦୁ ପର୍ୟ୍ୟଟକ ମନ୍ଦିର ଭିତରକୁ ପ୍ରବେଶ କରିଛନ୍ତି ବୋଲି ବ୍ରାହ୍ମଣ ନିଯୋଗ ସମ୍ପାଦକ ବିରଞ୍ଚି ନାରାୟଣ ପତି ଅଭିଯୋଗ କରିଛନ୍ତି।
ଦିଅଁଙ୍କ ସକାଳ ଧୂପ ପ୍ରସ୍ତୁତ ସମୟ ଅର୍ଥାତ ମଧ୍ୟାହ୍ନରେ ମନ୍ଦିର ସିଂହଦ୍ବାର ଦେଇ ଜଣେ ଅଣହିନ୍ଦୁ ପର୍ୟ୍ୟଟକ ସିଧା ଗରୁଡ଼ସ୍ତମ୍ଭ ନିକଟରେ ପହଞ୍ଚିଥିଲେ। ସେଠାରେ ଜଣେ ସେବାୟତଙ୍କ ନଜର ପଡ଼ିବା ପରେ ଘଟଣା ଜଣାପଡ଼ିଥିଲା। ଏହାପରେ ପ୍ରସ୍ତୁତ ହୋଇଥିବା ଅବଢ଼ା, କୋଠଭୋଗ ଅମଣିଆ କୂଅରେ ଫିଙ୍ଗା ଯାଇଥିଲା। ନୀତିକାନ୍ତି ପାଇଁ ବ୍ୟବସ୍ଥା କରାଯାଇଥିଲା। ମନ୍ଦିର
ଚତୁଃପାର୍ଶ୍ବରେ ଚୂନପାଣି ସିଞ୍ଚନ କରାଯାଇ ବଡ଼ଧୋକାଳ କରାଯାଇଥିଲା। ଦିଅଁଙ୍କ ମହାସ୍ନାନ, ସୂର୍ୟ୍ୟପୂଜା ଓ ଦ୍ବାରପାଳ ସହିତ ବେଶ କରାଯାଇଥିଲା। ଏହାପରେ ମନ୍ଦିର ପ୍ରଶାସନ ପକ୍ଷରୁ ଅବଢ଼ା ଏବଂ କୋଠଭୋଗ ପାଇଁ ସାମଗ୍ରୀ ଦିଆଯାଇଥିଲା। ପ୍ରାୟ ସନ୍ଧ୍ୟା ୫ଟା ୧୫ରେ ନୀତି କରାଯାଇଥିଲା। ଏହି ଘଟଣା ପରେ ଏବେ ମନ୍ଦିର ଓ ପୁଲିସ ପ୍ରଶାସନ ପକ୍ଷରୁ ଦୋଷ ଲଦାଲଦି ଚାଲିଛି। ସିଂହଦ୍ବାରରେ ଯେଉଁ କର୍ମଚାରୀ ନିୟୋଜିତ ଥିଲେ ସେ ସେହି ସମୟରେ ସେଠାରେ ନଥିବା ସେବାୟତଙ୍କ ପକ୍ଷରୁ ଅଭିଯୋଗ ହୋଇଛି।
Comments are closed.