ସମ୍ବଲପୁର : କରୋନା ଭୂତାଣୁ ଯୋଗୁଁ ଏବେ ବିଶ୍ୱର ବ୍ୟବସ୍ଥା ସବୁ ଓଲଟପାଲଟ ହୋଇଯାଇଛି। ତେବେ ଏହି ଭୂତାଣୁର ମୁକାବିଲା ପାଇଁ କରୋନା ଯୋଦ୍ଧା ମାନେ ସଂକ୍ରମଣକୁ ଖାତିର ନ କରି ନିଜ ତଥା ପରିବାରର ସ୍ୱାର୍ଥକୁ ପଛକୁ ଠେଲି ଦେଇ ଜନତାଙ୍କ ସୁରକ୍ଷା ପାଇଁ ଦିନରାତି ଏକ କରି କାର୍ଯ୍ୟରତ ରହିଛନ୍ତି। ଏପରିକି ବହୁ କରୋନା ଯୋଦ୍ଧା ଏହି ସଙ୍କଟଜନକ ପରିସ୍ଥିତିକୁ ଧ୍ୟାନରେ ରଖି ନିଜର ଖୁସି, ପରିବାରର ଦାୟିତ୍ୱକୁ ମଧ୍ୟ ତ୍ୟାଗ କରିଛନ୍ତି। ଏଭଳି ଏକ ଅନନ୍ୟ ଉଦାହରଣ ସୃଷ୍ଟି କରିଛନ୍ତି ସମ୍ବଲପୁରର ଜିଲାପାଳଙ୍କ କାର୍ଯ୍ୟାଳୟରେ କାର୍ଯ୍ୟରତ ପିଅନ ଚିତ୍ତରଞ୍ଜନ ବେହେରା । ସମ୍ବଲପୁର ନିବାସୀ ଚିତ୍ତରଞ୍ଜନଙ୍କର ବିବାହ ପାଇଁ ନିର୍ବନ୍ଧ ଫେବୃଆରୀ ୨୬ରେ ଶେଷ ହୋଇଥିବା ବେଳେ ମେ ୨୪ରେ ବିବାହ ଲଗ୍ନ ସ୍ଥିରିକୃତ ହୋଇଥିଲା । କିନ୍ତୁ କରୋନା ସଙ୍କଟ ମାର୍ଚ୍ଚ ମାସରେ ଆରମ୍ଭ ହେବା ପରେ ଚିତ୍ତରଞ୍ଜନ ପରିସ୍ଥିତିକୁ ଦେଖି ବିବାହ ସ୍ଥଗିତ ରଖିବା ପାଇଁ ନିଷ୍ପତ୍ତି ନେଇଥିଲେ। ଏବେ ଜିଲା ମୁଖ୍ୟାଳୟରେ କରୋନା ମୁକାବିଲା ପାଇଁ ସବୁ ଦିନ ସକାଳୁ ବିଳମ୍ବିତ ରାତ୍ରି ପର୍ଯ୍ୟନ୍ତ କାର୍ଯ୍ୟ ଚାଲୁଥିବା ବେଳେ ଚିତ୍ତରଞ୍ଜନ ମଧ୍ୟ ଅନ୍ୟ ଅଧିକାରୀ ଓ କର୍ମଚାରୀ ମାନଙ୍କ ସହିତ ତାଳଦେଇ କାମରେ ଲାଗି ରହିଛନ୍ତି। କରୋନା ମୁକାବିଲା ପାଇଁ ଲକ ଡାଉନ ଚାଲିଥିବା ବେଳେ କର୍ତ୍ତବ୍ୟକୁ ଗୁରୁତ୍ୱ ଦେଇ ସେ ତାଙ୍କର ବାହାଘର ଘୁଞ୍ଚାଇବା ପାଇଁ ପରିବାରଙ୍କୁ କହିଥିଲେ । ସମ୍ବଲପୁରରେ ହିଁ ତାଙ୍କର ବିବାହ ସ୍ଥିର ହୋଇଥିବା ବେଳେ ଦୁଇ ପରିବାର ସରକାରୀ କଟକଣା ହଟିବା ପରେ ପୁଣି ଆଲୋଚନା କରି ନୂତନ ବିବାହ ତାରିଖ ସ୍ଥିର କରିବା ପାଇଁ ନିଷ୍ପତ୍ତି ନେଇଛନ୍ତି। ବର୍ତ୍ତମାନ ପରିସ୍ଥିତିରେ ଦେଶର ସୁରକ୍ଷା ଓ କର୍ତ୍ତବ୍ୟ ବଡ ହୋଇଥିବାରୁ ସେ ଏଭଳି ନିଷ୍ପତ୍ତି ନେଇଥିବାର ଜଣାପଡିଛି। ଏହି ଘଟଣା ଜଣାପଡିବା ପରେ ଚିତ୍ତରଞ୍ଜନଙ୍କୁ ସବୁ ମହଲରେ ଉଚ୍ଚ ପ୍ରଶଂସା କରାଯାଉଛି।
Comments are closed.