ନୂଆଦିଲ୍ଲୀ: ‘ଭାରତର ଯଶ, ଭାରତୀୟମାନଙ୍କର ଅସାଧାରଣ ଦୟାପୂର୍ଣ୍ଣ ମନୋଭାବ ଏବଂ ସେମାନଙ୍କ ଆଦରରେ ମେଲାନିଆ ଏବଂ ମୁଁ ବିସ୍ମିତ। ଆମେ ଆପଣମାନଙ୍କ ଦ୍ବାରା କରାଯାଇଥିବା ଅତି ଚମତ୍କାର ସ୍ବାଗତକୁ ସର୍ବଦା ମନେ ରଖିବୁ।’ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ହାଇଦ୍ରାବାଦ ହାଉସରେ ଆଲୋଚନା ପରେ ସାମ୍ବାଦିକ ସମ୍ମିଳନୀରେ ଟ୍ରମ୍ପ ଭାରତୀୟଙ୍କ ଉଦ୍ଦେଶ୍ୟରେ ଏହା କହିଛନ୍ତି।
ଟ୍ରମ୍ପ କହିଥିଲେ, ଭାରତ ଏବଂ ଆମେରିକା ଆତଙ୍କବାଦ ବିରୋଧରେ ଲଢ଼ିବାକୁ ସହମତ। ଆମେ ଆଜି ଆପାଚି ଏବଂ ଏମଏଚ-୬୦ ରୋମିଓ ହେଲିକପ୍ଟର ସହିତ ଦୁନିଆର ଉତ୍ତମ ଅନନ୍ୟ ଆମେରିକୀୟ ସୈନ୍ୟ ଉପକରଣ ଭାରତକୁ ଯୋଗାଇଦେବା ଲାଗି ୩୦୦ କୋଟି ଡଲାର ଅର୍ଥରାଶିର ଚୁକ୍ତିକୁ ସ୍ବାକ୍ଷରିତ କରିବା ସହିତ ପ୍ରତିରକ୍ଷା କ୍ଷେତ୍ରରେ ଉଭୟ ଦେଶର ପାରସ୍ପରିକ ସହଯୋଗକୁ ବୃଦ୍ଧି କରିଛୁ। ଏହା ଆମର ମିଳିତ ପ୍ରତିରକ୍ଷା କ୍ଷମତାକୁ ବୃଦ୍ଧି କରିବ ବୋଲି ଟ୍ରମ୍ପ କହିଥିଲେ।
ଟ୍ରମ୍ପ ମୋଦୀଙ୍କ ଉଦ୍ଦେଶ୍ୟରେ କହିଥିଲେ, ଗତ ୨ ଦିନ, ବିଶେଷ କରି ଗତକାଲି ଷ୍ଟାଡିୟମର କାର୍ଯ୍ୟକ୍ରମ ମୋ ପାଇଁ ବହୁତ ସମ୍ମାନର ବିଷୟ ଥିଲା। ସେଠାରେ ପ୍ରାୟ ୧ ଲକ୍ଷ ୨୫ ହଜାର ଲୋକ ଷ୍ଟାଡିୟମରେ ଥିଲେ। ବୋଧହୁଏ ମୋ ଅପେକ୍ଷା ଆପଣ(ମୋଦୀ)ଙ୍କ ପାଇଁ ଅଧିକ ଲୋକ ଥିଲେ। ପ୍ରତି ଥର ଯେତେବେଳେ ମୁଁ ଆପଣ(ମୋଦୀ)ଙ୍କ ନାମ ନେଉଥିଲି, ସେତେବେଳେ ଲୋକମାନେ ଅତ୍ୟନ୍ତ ଖୁସି ହୋଇ କରତାଳିରେ ମୋ କଥାକୁ ସ୍ବାଗତ କରୁଥିଲେ। ଭାରତର ଲୋକମାନେ ଆପଣଙ୍କୁ ବହୁତ ଭଲ ପାଉଛନ୍ତି ଟ୍ରମ୍ପ କହିଥିଲେ।
