ଅମୃତସର : ସୀମା ସୁରକ୍ଷା ବଳ (ବିଏସଏଫ୍) ଯବାନମାନେ ଗୁରୁବାର ରାତିରେ ପାକ୍ ସୀମାନ୍ତବର୍ତ୍ତୀ ରାମକୋଟ୍ ଅଞ୍ଚଳରୁ ୪ କିଲୋ ଓଜନର ହେରୋଇନ ଜବତ କରିଛନ୍ତି। ଯବାନଙ୍କ କାର୍ଯ୍ୟାନୁଷ୍ଠାନରେ ଜଣେ ପାକିସ୍ତାନୀ ନାଗରିକ ପ୍ରାଣ ହରାଇଥିବାବେଳେ ଅନ୍ୟ ଜଣକୁ ଗିରଫ କରାଯାଇଛି। ପାଟ୍ରୋଲିଂ ସମୟରେ ସୀମାରେ କେତେକ ଲୋକ ସନ୍ଦେହଜନକଭାବେ ଚଳପ୍ରଚଳ ହେଉଥିବା ଲକ୍ଷ୍ୟ କରାଯାଇଥିଲା। ଯବାନମାନେ ସେମାନଙ୍କୁ ଅଟକିବାକୁ ନିର୍ଦେଶ ଦେଇଥିଲେ ସୁଦ୍ଧା ସେମାନେ ଏହାକୁ ଅମାନ୍ୟ କରି ଭାରତ ସୀମା ଆଡକୁ ଅଗ୍ରସର ହୋଇଥିଲେ। ବାରମ୍ବାର ଚେତାବନୀ ସତ୍ତ୍ୱେ ଅନୁପ୍ରବେଶକାରୀମାନେ ଏଥିପ୍ରତି କର୍ଣ୍ଣପାତ ନ କରିବା ଫଳରେ ଯବାନଙ୍କୁ ଗୁଳି ଚଳାଇବାକୁ ପଡିଥିଲା। ଫଳରେ ଜଣେ ପାକ୍ ନାଗରିକଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବାବେଳେ ଅନ୍ୟଜଣକୁ ଗିରଫ କରାଯାଇଥିଲା।
