ଜୟପୁର: ମୁମ୍ବଇର ବହୁ ଚର୍ଚ୍ଚିତ ହିଟ୍ ଆଣ୍ଡ ରନ୍ ଭଳି ଘଟଣାର ପୁନରାବୃତ୍ତି ଘଟିଛି ରାଜସ୍ଥାନର ଜୟପୁର ଅଞ୍ଚଳରେ। ସ୍ଥାନୀୟ ଜଣେ ବିଜେପି ନେତାଙ୍କ ପୁଅ ନିଶାସକ୍ତ ଅବସ୍ଥାରେ ଫୁଟ୍ପାଥରେ ଶୋଇଥିବା ଶ୍ରମିକ ଶ୍ରେଣୀର ୪ ଜଣଙ୍କ ଉପରେ ଗାଡ଼ି ଚଢ଼ାଇ ଦେଇଛନ୍ତି। ଗୁରୁତର ଭାବରେ ଚାରିଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇ ଜଣ ଗୁରୁତର ଅଛନ୍ତି। ସ୍ଥାନୀୟ ଲୋକେ ସମ୍ପୃକ୍ତ ଗାଡ଼ିଚାଳକଙ୍କୁ ଅଟକ ରଖି ପୁଲିସ ଜିମା ଦେଇଥିଲେ। ଗାଡ଼ି ଚାଳକଙ୍କୁ ପୁଲିସ ଗିରଫ କରିଛି। ଗିରଫ ଅଭିଯୁକ୍ତ ଜଣ ଭାରତ ଭୂଷଣ ମୀନା ବୋଲି ପୁଲିସ କହିଛି।
ପୁଲିସ ସୂଚନା ଅନୁଯାୟୀ, ଭାରତ ଓ ତାଙ୍କ ସାଥୀମାନେ ରାତିରେ ପ୍ରଚୁର ମଦ୍ୟପାନ କରି ଗାଡ଼ି ଚଳାଇ ଯାଉଥିଲେ। ଗାନ୍ଧିନଗର ରେଳଷ୍ଟେସନ୍ ନିକଟ ଫ୍ଲାଏଓଭର ତଳେ ଥିବା ଏକ ପେଭମେଣ୍ଟରେ ତାଙ୍କ ଗାଡ଼ି ପ୍ରଥମେ ଧକ୍କା ଖାଇଥିଲା। ଏହାପରେ ଗାଡ଼ିଟି ଭାରସମ୍ୟ ହରାଇ ଫୁଟ୍ପାଥ୍ ଉପରକୁ ମାଡ଼ି ଯାଇଥିଲା। ଗାଡ଼ିଟି ଭାରତଙ୍କ ବାପା ତଥା ବିଜେପି ନେତା ବଦ୍ରି ନାରାୟଣ ମୀନାଙ୍କ ନାମରେ ପଞ୍ଜିକୃତ ହୋଇଛି। ପୁଲିିସ ଗାଡ଼ି ଜବତ କରିବା ସହିତ ଭାରତଙ୍କ ନାମରେ ହତ୍ୟା ଓ ନିଶାସକ୍ତ ଅବସ୍ଥାରେ ବେପରୁଆ ଗାଡ଼ି ଚାଳନା ଅଭିଯୋଗରେ ମାମଲା ଦାଏର କରିଛି।
