ବ୍ରଜରାଜନଗର: ଝାରସୁଗୁଡା ଫରେଷ୍ଟ ଡିଭିଜନ ଅନ୍ତର୍ଗତ ବ୍ରଜରାଜନଗର ବନାଞ୍ଚଳ ତରଫରୁ ରବିବାର ବିଶ୍ୱ ବନ ଦିବସ ପାଳିତ ହୋଇଯାଇଛି। ଏହି ଅବସରରେ ଏକ ସଚେତନତା ରାଲି ରେଞ୍ଜ ଅଫିସରୁ ବାହାରି ଗାନ୍ଧିଛକ ଅଞ୍ଚଳ ପରିକ୍ରମା କରି ଜନସାଧରଣଙ୍କୁ ଜଙ୍ଗଲ ସୁରକ୍ଷା ଏବଂ ପରିବେଶ ସଚେତନତା ବାର୍ତ୍ତା ପ୍ରଦାନ କରିଥିଲା। ବିଶ୍ୱ ବନ ଦିବସ ଉପଲକ୍ଷେ ଆୟୋଜିତ ସଭାରେ ମୁଖ୍ୟ ଅତିଥି ଭାବେ ଏମସିଏଲ ଇବ ଭ୍ୟାଲି ମହାପ୍ରବନ୍ଧକ ଅନବର ହୁସେନ, ସମ୍ମାନିତ ଅତିଥି ଭାବେ ଲଖନପୁର କୋଇଲା ଖଣି କ୍ଷେତ୍ରର ପରିବେଶ ଅଧିକାରୀ ଚିଲମବର୍ଷନ, ସାମ୍ବାଦିକ ଉପନ ଚରଣ ସାହୁ ଯୋଗ ଦେଇଥିଲେ। କାର୍ୟ୍ୟକ୍ରମର ଅଧ୍ୟକ୍ଷତା ବ୍ରଜରାଜନଗର ରେଞ୍ଜର ଆରତୀ ନେଗି କରିଥିଲେ। ରାସ୍ତା ଘାଟର ନିର୍ମାଣ ଓ ପ୍ରଶସ୍ତିକରଣ, ବାସସ୍ଥଳୀ ତଥା ବଡ଼ ବଡ଼ ଅଟ୍ଟାଳିକା ନିର୍ମାଣ, ଶିଳ୍ପାନୁଷ୍ଠାନ ଆଦିର ବିକାଶିକରଣ ଯୋଗୁଁ ଜଙ୍ଗଲ ଧ୍ୱଂସ ଓ ଗଛ କଟା ଯାଉଥିବାର କାରଣରୁ ସାରା ବିଶ୍ୱରେ ଭୂମଣ୍ଡଲୀୟ ଉତ୍ତାପରେ ବୃଦ୍ଧି ଓ ଜଳବାୟୁ ପରିବର୍ତ୍ତନ ପରି ସମସ୍ୟା ଦେଖା ଦେବାରେ ଲାଗିଛି। ତେଣୁ ଏହାର କ୍ଷତିପୂରଣ ଓ ସମାଧାନ ଦିଗରେ ବୃକ୍ଷ ରୋପଣ ସହିତ ଏହାର ସଂରକ୍ଷଣ ନିହାତି ଆବଶ୍ୟକ ବୋଲି ଅତିଥିଗଣ ମତ ପ୍ରକାଶ କରିଥିଲେ।
ଆଜିର କାର୍ଯ୍ୟକ୍ରମରେ ରାଜପୁର ଫରେଷ୍ଟର ଆମିର ପଟେଲ, ମେଗା ନର୍ସରୀ ଫରେଷ୍ଟର ଆଲୋକ ନାୟକ, ବ୍ରଜରାଜନଗର ଫରେଷ୍ଟର ଗୋୖରାଙ୍ଗ ସାହୁ, ବନ୍ଧବାହାଲ ଫରେଷ୍ଟର ସଞ୍ଜିତ ଚୌଧୁରୀ, ବନ କର୍ମଚାରୀ ତିଲୋତ୍ତମା ମରେଇ, ସୋନମ ପଟେଲ, କିଶୋର କୁମାର ଷଣ୍ଢ, ସୁଶୀଲ ବେହେରା, ଉପେନ୍ଦ୍ର ବେସନ, ଶାନ୍ତନୁ ପ୍ରଧାନ, ରାଜ କିଶୋର ପାଣିଗ୍ରାହୀ, ଶିବ ଶଙ୍କର ମୁଣ୍ଡା, ରିମା ପଟେଲ ସମେତ ବହୁ ବନ ସୁରକ୍ଷା ସମିତିର ସଭାପତି ଉପସ୍ଥିତ ଥିଲେ।
