ଥିରୁଭାନନ୍ଥପୁରମ୍: ଶାବରୀମାଳା ମନ୍ଦିରରେ ଦୁଇ ମହିଳାଙ୍କ ପ୍ରବେଶ ପରେ ବିବାଦ ଉଠିଛି। ଏହି ଘଟଣାରୁ ସୃଷ୍ଟ ଉତ୍ତେଜନା ଓ ହିଂସାରେ ଜଣକ ଜୀବନ ଯାଇଥିବା ବେଳେ ଶତାଧିକ ଆହତ ହୋଇଛନ୍ତି। ଶତାଧିକଙ୍କୁ ଗିରଫ କରାଯାଇଛି। କିନ୍ତୁ ପୁଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ ମହିଳାଙ୍କ ପାଇଁ ପ୍ରବେଶ ନିଷେଧ ଥିବା ଏହି ମନ୍ଦିରରେ ୧୦ ଜଣ ମହିଳା ପ୍ରବେଶ କରିଛନ୍ତି। ସିସିଟିଭି ଫୁଟେଜ୍ରୁ ଏହି ତଥ୍ୟ ମିଳିଛି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ କି ନାହିଁ ସେ ସମ୍ପର୍କରେ ନିଷ୍ପତ୍ତି ହୋଇପାରିନାହିଁ। ତେବେ ଅନଧିକାର ପ୍ରବେଶ କରିଥିବା ମହିଳାଙ୍କ ବିଷୟରେ ସିସିଟିଭି ଫୁଟେଜ୍ରୁ ତଥ୍ୟ ସଂଗ୍ରହ କରାଯାଉଛି। ତାମିଲନାଡ଼ୁ ଓ ମାଲେସିଆରୁ ଆସିଥିବା ୨୫ ଜଣ ମହିଳା ଦର୍ଶନାର୍ଥୀଙ୍କ ନାମ ଓ ବୟସ ପୁଲିସ ନିକଟରେ ଅଛି। ସେମାନଙ୍କ ମଧ୍ୟରୁ ୫ ଜଣ ମନ୍ଦିରରେ ପ୍ରବେଶ କରି ଆୟାପ୍ପାସ୍ୱାମୀଙ୍କୁ ପୂଜାର୍ଚ୍ଚନା କରିଛନ୍ତି। ତା ପରେ ଶ୍ରୀଲଙ୍କାର ଆଉ ଜଣେ ମହିଳା ମନ୍ଦିରରେ ପ୍ରବେଶ କରିଥିଲେ। ତେବେ ଗତ ୧ ତାରିଖରେ ଅନ୍ୟ ୪ ଜଣ ମହିଳା ମନ୍ଦିରରେ ପ୍ରବେଶ କରିଥିବା ପୁଲିସ କହିଛି। ସେଥିମଧ୍ୟରୁ ଜଣେ ମହିଳାଙ୍କ ମୁହଁ ଦେଖାଯାଉଥିବା ବେଳେ ଅନ୍ୟ ତିନି ଜଣ ମହିଳା ସେମାନଙ୍କ ଶରୀରକୁ ଆବୃତ୍ତ ରଖିଥିବା ଦେଖାଯାଉଛି। ସୂଚନାଯୋଗ୍ୟ, ୧୦ ବର୍ଷରୁ ୫୦ ବର୍ଷ ବୟସର ମହିଳାଙ୍କୁ ମନ୍ଦିରରେ ପ୍ରବେଶ ପାଇଁ ବହୁ ବର୍ଷରୁ କଟକଣା ରହିଛି। ତେବେ ଗତ ବର୍ଷ ସେପ୍ଟେମ୍ବର ମାସରେ ସୁପ୍ରିମକୋର୍ଟ ଏହି କଟକଣା ଉଠାଇଦେବା ପରେ ବିରୋଧାଭାସ ସୃଷ୍ଟି ହୋଇଛି। ମନ୍ଦିରରେ ପୂଜାର୍ଚ୍ଚନା କରିବା ପାଇଁ ପ୍ରାୟ ୪୨୦୦ ମହିଳା ଅନ୍ଲାଇନ୍ରେ ଆବେଦନ କରିଛନ୍ତି।
