କଟକ: ଷ୍ଟୋନମ୍ୟାନ ଆକ୍ରମଣରେ ତିନିଜଣଙ୍କ ମୃତ୍ୟୁ ଘଟିବା ନେଇ ସହରବାସୀ ଏକପ୍ରକାର ଆତଙ୍କିତ ଅବସ୍ଥାରେ ରହିଥିବା ବେଳେ ରବିବାର ରାତିରେ ଯୋବ୍ରା ମଲ୍ଲାସାହି ଅଞ୍ଚଳର ଜଣେ ମହିଳା ଆକ୍ରମଣର ଶିକାର ହୋଇଛନ୍ତି। ତାଙ୍କ ବେକରେ ଆଘାତ ଲାଗିଛି। ତାଙ୍କୁ ବଡମେଡିକାଲ ଆଶୁଚିକିତ୍ସା ବିଭାଗରେ ଭର୍ତ୍ତି କରାଯାଇଛି। ଖବର ପାଇ ପୁଲିସର ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି।
ସ୍ଥାନୀୟ ଲୋକଙ୍କ ସୂଚନା ଅନୁଯାୟୀ, ରବିବାର ରାତି ପ୍ରାୟ ସାଢ଼େ ୧୦ଟାରେ ମହିଳାଜଣକ ଏକୁଟିଆ ଥିବାବେଳେ ଜଣେ ଯୁବକ ତାଙ୍କ ଘରର କବାଟ ବାଡ଼େଇଥିଲେ। କବାଟ ଖୋଲିବା ମାତ୍ରେ ଯୁବକଜଣକ ହାତରେ ଧରିଥିବା ଏକ ଧାରୁଆ ଅସ୍ତ୍ରରେ ଆକ୍ରମଣ କରିବାରୁ ମହିଳାଙ୍କ ବେକରେ ଆଘାତ ଲାଗିଥିଲା। ଅପରପକ୍ଷରେ ପୁଲିସର କହିବା ଅନୁଯାୟୀ, ମହିଳାଜଣକ କବାଟ ଖୋଲାରଖି ଘର ଓଳାଉଥିବାବେଳେ କେହି ଜଣେ ଦୁର୍ବୃତ୍ତ ତାଙ୍କ ବେକରୁ ସୁନାହାର ଛିଣ୍ଡାଇ ନେବାକୁ ଉଦ୍ୟମ କରିଥିଲା। ହାରଟି ନ ଛିଣ୍ଡିବାରୁ ମହିଳାଙ୍କ ବେକ କଟିଯାଇଥିବା ସନ୍ଦେହ କରାଯାଉଛି। ତେବେ ମହିଳାଙ୍କ ସୂଚନା ଆଧାରରେ ଅଭିଯୁକ୍ତକୁ ଧରିବା ପାଇଁ ଉଦ୍ୟମ ଜାରି ରହିଥିବା ମାଲଗୋଦାମ ଥାନା ଅଧିକାରୀ ରବିନାରାୟଣ ଭଞ୍ଜ ସୂଚନା ଦେଇଛନ୍ତି। ତେବେ ଏହି ଘଟଣା ପରେ ସ୍ଥାନୀୟ ଲୋକମାନେ ଘଟଣାସ୍ଥଳରେ ଏକତ୍ରିତ ହୋଇଥିଲେ। ସମସ୍ତେ ଅଜଣା ଆକ୍ରମଣକାରୀ ବିଷୟରେ ଆଲୋଚନା କରୁଥିବା ଦେଖାଯାଇଥିଲା।
Comments are closed.