ଲଣ୍ଡନ – ଚଳିତ ସପ୍ତାହରେ ଆରମ୍ଭ ହେବାକୁ ଥିବା ୱିମ୍ବଲଡନ୍ ଟେନିସ୍ ଟୁର୍ଣ୍ଣାମେଣ୍ଟ ପାଇଁ ପୁରୁଷ ଓ ମହିଳା ସିଙ୍ଗଲ୍ସ ଖେଳାଳିଙ୍କ ସିଡ୍ (ମାନ୍ୟତା) ବୁଧବାର ଘୋଷଣା କରାଯାଇଛି। ପୁରୁଷ ସିଙ୍ଗଲ୍ସରେ ସୁଇଜରଲ୍ୟାଣ୍ଡର ରୋଜର ଫେଡେରର୍ ଓ ମହିଳା ସିଙ୍ଗଲ୍ସରେ ରୋମାନିଆର ସିମୋନା ହାଲେପ୍ ଟପ୍ ସିଡ୍ ଅଛନ୍ତି। ମହିଳା ସିଙ୍ଗଲ୍ସ ମାନ୍ୟତାରେ ୭ଥର ୱିମ୍ବିଲଡନ୍ ଚମ୍ପିଆନ୍ ସେରେନା ୱିଲିୟମ୍ସଙ୍କୁ ୨୫ନଂ ସିଡ୍ ମିଳିଛି। ଗତବର୍ଷ ସେପ୍ଟେମ୍ବରରେ ମାତୃତ୍ୱ ଲାଭ କରିବା ପରେ ସେରେନା ଫ୍ରେଞ୍ଚ ଓପନ୍ରେ ଖେଳିଥିଲେ ମଧ୍ୟ ତାଙ୍କୁ କୌଣସି ସିଡ୍ ମିଳିନଥିଲା। ଫ୍ରେଞ୍ଚ ଓପନ୍ରେ ସେରେନା ଚତୁର୍ଥ ରାଉଣ୍ଡରେ ପ୍ରବେଶ କରିଥିଲେ। ଚତୁର୍ଥ ରାଉଣ୍ଡରେ ରୁଷିଆର ମାରିଆ ସାରାପୋଭାଙ୍କ ବିପକ୍ଷରେ ମ୍ୟାଚ୍ ଖେଳୁଥିବା ବେଳେ କାନ୍ଧରେ ଆଘାତଜନିତ କାରଣରୁ ସେ ମ୍ୟାଚ୍ରୁ ଓହରି ଯାଇଥିଲେ।
ଅନ୍ୟପକ୍ଷରେ ପୁରୁଷ ସିଙ୍ଗଲ୍ସରେ ଦୁଇଥର ୱିମ୍ବିଲଡନ୍ ଚମ୍ପିଆନ୍ ଆଣ୍ଡି ମରେଙ୍କୁ କୌଣସି ସିଡ୍ ମିଳିନାହିଁ। ସୂଚନାଥାଉକି ୩୧ ବର୍ଷୀୟ ମରେ ଆଘାତପ୍ରାପ୍ତ ହୋଇ ୧୧ମାସ ଟେନିସ୍ ଜଗତରୁ ଦୂରେଇ ରହିଥିଲେ। ତାଙ୍କ ନିତମ୍ବରେ ଅସ୍ତ୍ରୋପଚାର ମଧ୍ୟ ହୋଇଥିଲା। ସେ ୱିମ୍ବିଲଡନ୍ରେ ଖେଳିବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ପୁରୁଷ ସିଙ୍ଗଲ୍ସରେ ଫେଡେରର ୧ନଂ, ରାଫାଲ ନାଦାଲ ୨ନଂ, ମାରିନ୍ ସିଲିକ୍ ୩ନଂ, ଆଲେକଜାଣ୍ଡାର ଜେରେଭ୍ ୪ର୍ଥ, ଜୁଆନ୍ ମାର୍ଟିନ ଡେଲ୍ ପୋଟ୍ରୋ ୫ନଂ, ଗ୍ରିଗୋର୍ ଡିମିଟ୍ରୋଭ୍ ୬ନଂ, ଡୋମିନିକ୍ ଥିଏମ୍ ୭ନଂ, କେଭିନ୍ ଆଣ୍ଡରସନ୍ ୮ନଂ, ଜନ୍ ଇସନ୍ର ୯ନଂ ଓ ଡେଭିଡ୍ ଗୋଫିନ୍ଙ୍କୁ ୧୦ନଂ ସିଡ୍ ମିଳିଛି। ମହିଳା ସିଙ୍ଗଲ୍ସରେ ସିମୋନା ହାଲେପ୍ଙ୍କୁ ୧ନଂ, କାରୋଲାଇନ୍ ୱଜ୍ନିଆକିଙ୍କୁ ୨ନଂ, ଗାରର୍ବାଇନ୍ ମୁଗୁରୁଜା ୩ନଂ, ସ୍ଲୋଆନେ ଷ୍ଟିଫେନ୍ସ ୪ନଂ, ଏଲିନା ସ୍ୱିତୋଲିନା ୫ନଂ, କାରାଲାଇନ୍ ଗାର୍ସିଆ ୬ନଂ, କାରୋଲିନା ପ୍ଲିସକୋଭା ୭ନଂ, ପେଟ୍ରା କ୍ୱିଟୋଭା ୮ନଂ, ଭେନ୍ସ ୱିଲିୟମ୍ସ ୯ନଂ ଓ ମାଡିସନ୍ କିଜ୍ଙ୍କୁ ୧୦ନଂ ସିଡ୍ ମିଳିଛି।
