ଖପ୍ରାଖୋଲ: ଖପ୍ରାଖୋଲ ବ୍ଲକ ଭାନପୁର ପଂଚାୟତ ଭୁର୍ଷିବାଂଜି ଗାଁରେ ସ୍ୱାଧୀନତାର ୭୨ ବର୍ଷ ପରେ ମଙ୍ଗଳବାର ବିଜୁଳି ଆଲୁଅ ଜଳିଛି। ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ପ୍ରବଳ ଉତ୍ସାହ ଦେଖାଦେଇଛି। ୩୦ଟି ପରିବାର ରହୁଥିବା ଏହି ଗାଁରେ ଅର୍ଦ୍ଧାଧିକ ଆଦିବାସୀ ସମାଜର ଲୋକେ ବସବାସ କରନ୍ତି। ଗାଁକୁ ବିଜୁଳି ଆଲୁଅ ସିନା ପହଂଚିଲା ହେଲେ ଆଜି ବି ମୌଳିକ ସୁବିଧାର ବହୁ ଦୂରରେ ଏହି ଗାଁକୁ ଭଲ ରାସ୍ତା ନ ଥିବାବେଳେ ଗୋଟିଏ ପଟେ ନାଳରେ ପୋଲ ହୋଇ ନ ଥିବାରୁ ଗାଁର ପିଲାମାନେ ବର୍ଷା ଦିନେ ସ୍କୁଲ ଯିବାରୁ ବଂଚିତ ହୋଇଥାନ୍ତି। ସେହିପରି ଗାଁରେ ଅଙ୍ଗନଓାଡି କେନ୍ଦ୍ର ମଧ୍ୟ ନାହିଁ। ଆଶା କର୍ମୀ ନ ଥିବାରୁ ୨ କିମି ଦୂର ତୁର୍ଲା ଗାଁର ଆଶା କର୍ମୀ ଗାଁର ସ୍ୱାସ୍ଥ୍ୟ କଥା ବୁଝନ୍ତି। ସେହିପରି ବିଦ୍ୟାଳୟ ମଧ୍ୟ ନାହିଁ।
ବିଜୁଳି ସଂଯୋଗ ପରେ ଗାଁର ସାମୁହିକ ବିକାଶ ପାଇଁ ମିଳିତ ଉଦ୍ୟମ କରିବାକୁ ଏକ ପ୍ରୟାସ ବୁଧବାର ଆରମ୍ଭ ହୋଇଛି। ଗାଁରେ ଗ୍ରାମବାସୀଙ୍କ ତରଫରୁ ଆହୁତ ଏକ କାର୍ଯ୍ୟକ୍ରମରେ ଜିଲ୍ଲାପରିଷଦ ସଭ୍ୟ ବିପ୍ର ବିଶି ଅଧ୍ୟକ୍ଷତା କରିଥିବାବେଳେ ମୁଖ୍ୟ ଅତିଥି ରୁପେ ଗୋଷ୍ଠି ଉନ୍ନୟନ ଅଧିକାରୀ ତରଣୀ ସୁନା, ସମ୍ମାନିତ ଅତିଥି ରୁପେ ଜିଲ୍ଲା ଯୋଜନା ବୋର୍ଡ ସଦସ୍ୟ ତଥା ଜିଲ୍ଲାପରିଷଦ ସଭ୍ୟ ସତ୍ୟନାରାୟଣ ଭୋଇ, ପଶ୍ଚିମ ଓଡିଶା ଆଦିବାସୀ କଲ୍ୟାଣ ସଂଘ ମହାସଚିବ ନିରଂଜନ ବିଶି, ବଲାଙ୍ଗିର ଲୋକସଭା ସାଂସଦ ପ୍ରତିନିଧି ଅଭୟ ତ୍ରିପାଠୀ ପ୍ରମୁଖ ଯୋଗଦେଇ ଗାଁର ସାମୁହିକ ବିକାଶ ପାଇଁ ଗ୍ରାମବାସୀ ସଂଗଠିତ ହେବାକୁ କହିବା ସହ ସରକାରୀ ସ୍ତରରେ ସମସ୍ତ ସହାୟତା ଯୋଗେଇଦେବାକୁ ପ୍ରତିଶୃତି ଦେଇଥିଲେ।