ଲକ୍ଷ୍ମୀପୁର : କୋରାପୁଟ ଜିଲା ଲକ୍ଷ୍ମୀପୁର ବ୍ଲକରେ ଆନ୍ଥ୍ରାକ୍ସ ରୋଗ ଦେଖାଦେଇଥିବା ବେଳେ ଏଥିରେ ଦୁଇ ଜଣ ଆକ୍ରାନ୍ତ ହୋଇଥିବା ଜଣାପଡିଛି । ବ୍ଲକର ଉପର କୁଟିଙ୍ଗା ଗ୍ରାମରେ ଏଥିରେ ଦୁଇଜଣ ଆକ୍ରାନ୍ତ ହେଉଛନ୍ତି ମୁକୁନା ମିଣିଆକା ଓ ଉକୁ ମିଣିଆକା । ଏମାନଙ୍କ ହାତ ଓ ଗୋଡରେ ଘାଆ ହୋଇଥିବାବେଳେ ଆନ୍ଥ୍ରାକ୍ସର ଲକ୍ଷଣ ପରି ପରିଲକ୍ଷିତ ହୋଇଛି । ଉଭୟଙ୍କୁ କୋରାପୁଟ ମେଡିକାଲ କଲେଜକୁ ନିଆଯାଇ ତାଙ୍କର ରକ୍ତ ନମୁନା ସଂଗ୍ରହ କରାଯାଇଥିବା ଜଣାପଡିଛି । ସେହିପରି କୋରାପୁଟରୁ ଏକ ମେଡିକାଲ୍ ଟିମ ଗ୍ରାମ ପରିଦର୍ଶନ କରି ଯାଇଥିବା କୁହାଯାଇଛି ।
ତିନି ଦିନ ତଳେ କୁଟିଙ୍ଗା ଗ୍ରାମରେ ଦୁଇଜଣଙ୍କ ଠାରେ ରୋଗର ଲକ୍ଷଣ ଦେଖାଯାଇଛି । ଦୁଇ ଜଣଙ୍କୁ କୋରାପୁଟ ନିଆଯାଇ ମେଡିକାଲ୍ କଲେଜ୍ ରେ ଭର୍ତ୍ତି କରାଯାଇଥିଲା , କିନ୍ତୁ ସେମାନେ କାହାକୁ ନକହି ପଳାଇ ଆସିଥିବା ଜଣାପଡିଛି । ଏହି ରୋଗ ହେଲେ ଗ୍ରାମର ଲୋକମାନେ ଏହାକୁ ଲୁଚାଇଥାନ୍ତି । ତେବେ ସଚେତନତା ପାଇଁ ବୁଧବାର ମହିଳା ସ୍ବାସ୍ଥ୍ୟକର୍ମୀ ଓ ଆଶା କର୍ମୀମାନେ ଉକ୍ତ ଗ୍ରାମରେ ଡାକ ବାଜି ଯନ୍ତ୍ରରେ ରୋଗୀଣା ମଲା ପଶୁ ପକ୍ଷୀ ମାଂସ ଖାଇବାକୁ ବାରଣ କରିଛନ୍ତି । ଅନ୍ୟପକ୍ଷରେ ରକ୍ତ ପରୀକ୍ଷା ରିପୋର୍ଟ ଆସିବା ପରେ ପକୃତ କଥା ଜଣାପଡିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି । ସେହିପରି ଜୟପୁରରୁ ଏକ ଅନୁସନ୍ଧାନକାରୀ ଟିମ୍ ଗ୍ରାମ ପରିଦର୍ଶନ କରିଥିବା ଜଣାପଡିଛି । ପୁର୍ବରୁ ମଧ୍ୟ ବ୍ଲକର କେତେକ ଗ୍ରାମରେ ଆନ୍ଥ୍ରାକ୍ସ ରୋଗ ହୋଇଥିବାବେଳେ କିଛି ଜଣ ମୃତ୍ୟୁବରଣ କରିଥିଲେ ।
Comments are closed.