ଜେନାପୁର/ଧର୍ମଶାଳା: ୧୬ନଂ ଜାତୀୟ ରାଜପଥ ଭାଲୁଖାଇ ନିକଟରେ ବୁଧବାର ଏକ ଅଭାବନୀୟ ସଡକ ଦୁର୍ଘଟଣାରେ ଉଭୟ ଗାଡିର ଚାଳକ ଓ ସହ-ଚାଳକଙ୍କ ମୃତ୍ୟୁ ଘଟିଛି।
ସୂଚନା ମୁତାବକ, ଆଜି ଭୋର ସମୟରେ ଏକ ଟ୍ରକ ଲୁହାଛଡ଼ ବୋଝେଇ କରି କଟକରୁ କଲିକତା ଅଭିମୁଖେ ଯାଉଥିବାବେଳେ ଭାଲୁଖାଇ ନିକଟରେ ଟାୟାର ଫାଟିଯାଇଥିଲା। ସହ-ଚାଳକ ଟାୟାର ଲଗାଉଥିବାବେଳେ ସେହି ଦିଗରୁ ଏକ ଟ୍ରଲର ଲୁହାଛଡ ବୋଝେଇ କରି କଲିକତା ଅଭିମୁଖେ ଯାଉଥିବାବେଳେ ପୂର୍ବରୁ ବ୍ରେକ ଡାଉନ ହୋଇ ଠିଆହୋଇଥିବା ଟ୍ରକ ପଛରେ ଧକ୍କା ଦେଇଥିଲା । ଧକ୍କା ପ୍ରଚଣ୍ଡ ଥିବାରୁ ଟ୍ରଲର ସମ୍ମୁଖ ଭାଗରେ ନିଆଁ ଲାଗି ଯାଇଥିଲା । ଚାଳକ ଜଣକ ଟ୍ରଲର ଭିତରେ ଚାପି ହୋଇ ରହିଥିବାରୁ ନିଆଁରେ ପୋଡି ହୋଇ ମୃତ୍ୟୁ ହୋଇଥିବା ଜଣାଯାଇଛି। ଏପଟେ ଧକ୍କା ଫଳରେ ବ୍ରେକଡାଉନ ଟ୍ରକଟି ଆଗକୁ ଗଡିଯିବାରୁ ଟ୍ରକ ତଳେ ଟାୟାର ଲଗାଉଥିବା ସହ-ଚାଳକ ଉପରେ ଚକ ଚଢି ଯାଇଥିଲା। ରକ୍ତ ଜୁଡୁବୁଡୁ ଅବସ୍ଥାରେ ତାଙ୍କୁ ସ୍ଥାନୀୟ ଲୋକେ ଆମ୍ବୁଲାନ୍ସ ଯୋଗେ ବଡଚଣା ଡାକ୍ତରଖାନାରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ସମୟରେ ସହ-ଚାଳକଙ୍କ ମୃତ୍ୟୁ ଘଟିଛି । ଟ୍ରଲର ଚାଳକଙ୍କ ନାମ ମାନସ ସାହୁ କୁହାଯାଉଥିବା ବେଳେ ଟ୍ରକ ସହ-ଚାଳକଙ୍କ ନାମ ଜଣାପଡିନାହିଁ । ଚଣ୍ଡିଖୋଲ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ଖବର ପାଇ ଧର୍ମଶାଳା ଥାନା ଅଧିକାରୀ ରାକେଶ କୁମାର ତ୍ରିପାଠୀ ସଦଳବଳେ ସେଠାରେ ପହଞ୍ଚି ଗୋଟାଏ ସାଇଡ ରାସ୍ତା ବନ୍ଦ କରି ଦୁର୍ଘଟଣାଗ୍ରସ୍ତ ଟ୍ରକ ଓ ଟ୍ରେଲରକୁ କ୍ରେନ ସାହାଯ୍ୟରେ ଉଠାଇ ରାସ୍ତା ସ୍ୱାଭାବିକ କରିବା ସହିତ ଗାଡି ଦୁଇଟିକୁ ଜବତ କରିଥିଲେ । ଏନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଥାନା ପକ୍ଷରୁ କୁହାଯାଇଛି।
