ଆନ୍ଧ୍ରପ୍ରଦେଶ: ଜମି ପାଇଁ ମା’ ଝିଅଙ୍କୁ ଜୀଅନ୍ତା ପୋତିଦେଲେ । ସ୍ଥାନୀୟ ବାସିନ୍ଦା ଆସି ବଞ୍ଚାଇଲେ ଜୀବନ । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଆନ୍ଧ୍ରପ୍ରଦେଶ ଶ୍ରୀକାକୁଲମ ଜିଲ୍ଲାର ହରିପୁରାମ ଗ୍ରାମରେ । ଯାହାର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେଉଛି । ସୂଚନାନୁସାରେ ୬୦ ବର୍ଷିୟ କୋଟରା ଦଲମା ଓ ତାଙ୍କ ୪୦ ବର୍ଷିୟ ଝିଅ ମଜି ସାବିତ୍ରୀଙ୍କ ଉପରେ ମାଟି ପକାଇ ଜୀଅନ୍ତା ମାରିଦେବାକୁ ଉଦ୍ୟମ କରାଯାଇଛି ।
ଦୀର୍ଘଦିନ ଧରି ଜମିକୁ ନେଇ କୋଟରାଙ୍କ ସହ ତାଙ୍କ ସମ୍ପର୍କୀୟଙ୍କ ବିବାଦ ଲାଗି ରହିଥିଲା । ଗତ ସାତ ବର୍ଷ ଧରି ଏହି ମାମଲା କୋର୍ଟରେ ଚାଲୁଥିବାରୁ ଜମିକୁ ଦଖଲ ପାଇଁ ତାଙ୍କ ସମ୍ପର୍କୀୟ ଉଦ୍ୟମ କରିଥିଲେ । ଟ୍ରାକ୍ଟରରେ ମାଟି ଆଣି ସେହି ଜାଗାରେ ପକାଇବାକୁ ଉଦ୍ୟମ କରାଯାଉଥିଲା । ଏହାକୁ କୋଟରା ଦଲମା ଓ ତାଙ୍କ ଝିଅ ବିରୋଧ କରିବାରୁ ସେହି ଜମିରେ ପଡ଼ିବାକୁ ଥିବା ମାଟିକୁ ତାଙ୍କ ଉପରେ ଢ଼ାଳି ଦିଆଯାଇଥିଲା । ଯାହାକୁ ଦେଖି ସ୍ଥାନୀୟ ଲୋକ ଉଭୟ ମା’ ଝିଅଙ୍କୁ ସେଠାରୁ ଉଦ୍ଧାର କରିଥିଲେ । ସେହି ସମୟର ଭିଡିଓ ବର୍ତ୍ତମାନ ଭାଇରାଲ ହେବାର ଲାଗିଛି ।
ଘଟଣାଟି ଗତକାଲି ଘଟିଥିବା ବେଳେ, ସମ୍ପୃକ୍ତ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ମହିଳା ଜଣଙ୍କୁ ମାଟି ଖୋଳି ଉଦ୍ଧାର କରାଯାଇଥିବା ଭିଡିଓରେ ଦେଖିବାକୁ ମିଳୁଛି । ଭିଡିଓଟି ଭାଇରାଲ ହେବା ପରେ ଘଟଣାକୁ ଗୁରୁତର ସହ ନେଇଛନ୍ତି ସ୍ଥାନୀୟ ପୁଲିସ ଅଧିକାରୀ । ଭିଡିଓ ଆଧାରରେ ତଦନ୍ତ କରିବାକୁ ନିର୍ଦେଶ ଦେଇଛନ୍ତି । ମାଣ୍ଡସା ଏସଆଇ ରବି କୁମାର ତାଙ୍କ ପ୍ରତିକ୍ରିୟାରେ କହିଛନ୍ତି, ପୀଡିତା ଏବଂ ଅଭିଯୁକ୍ତ ଉଭୟ ସମ୍ପର୍କୀୟ । ଏହି ଜମି ବିବାଦ କୋର୍ଟରେ ଚାଲୁଛି । ବର୍ତ୍ତମାନର ଏହି ଘଟଣାକୁ ନେଇ ମଧ୍ୟ ଏକ ମାମଲା ରୁଜୁ ହୋଇଛି ।
Comments are closed.