ନୂଆଦିଲ୍ଲୀ : କରୋନା ଭୂତାଣୁ ସଂକ୍ରମଣରେ ଆନ୍ଧ୍ରପ୍ରଦେଶ ତିରୁପତିର ସାଂସଦ ବାଳି ଦୁର୍ଗା ପ୍ରସାଦ ରାଓ ପ୍ରାଣ ହରାଇଛନ୍ତି। ୬୪ବର୍ଷୀୟ ରାଓ କରୋନା ସଂକ୍ରମିତ ହେବା ପରେ ଚେନ୍ନଇର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ବୁଧବାର ପ୍ରାଣ ହରାଇଛନ୍ତି। ଚିକିତ୍ସାଧୀନ ଅବସ୍ଥାରେ ତାଙ୍କର ହୃଦ୍ଘାତ ହେବାରୁ ମୃତ୍ୟୁ ହୋଇଥିବା ଡାକ୍ତର କହିଛନ୍ତି। ୱାଇଏସଆର କଂଗ୍ରେସ ପାର୍ଟିର ସାଂସଦ ଶ୍ରୀ ରାଓଙ୍କ ମୃତ୍ୟୁରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଦଳର ମୁଖ୍ୟ ତଥା ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡି ଗଭୀର ଦୁଃଖ ପ୍ରକାଶ କରିଛନ୍ତି। ମୁଖ୍ୟମନ୍ତ୍ରୀ ରେଡ୍ଡି ଦିବଂଗତ ସାଂସଦଙ୍କ ପରିବାର ଲୋକଙ୍କୁ ଫୋନ କରି ସମବେଦନା ଜଣାଇଛନ୍ତି। ଶ୍ରୀ ରାଓ ୧୯୮୫ରେ ଅବିଭକ୍ତ ଆନ୍ଧ୍ରପ୍ରଦେଶର ନେଲୋର ଜିଲା ଗୁଡୁର ବିଧାନସଭା ଆସନରୁ ପ୍ରଥମେ ନିର୍ବାଚିତ ହୋଇଥିଲେ। ସେ ତିନି ଥର ବିଧାୟକ ରହିବା ସହିତ ଚନ୍ଦ୍ରବାବୁ ନାଇଡୁଙ୍କ ନେତୃତ୍ବ ତେଲୁଗ ଦେଶମ ପାର୍ଟିରେ ପ୍ରଥମେ ସଦସ୍ୟ ରହିଥିଲେ। ୧୯୯୬ରୁ ୧୯୯୮ ପର୍ଯ୍ୟନ୍ତ ସେ ଚନ୍ଦ୍ରବାବୁ ନାଇଡୁଙ୍କ ସରକାରରେ ମନ୍ତ୍ରୀ ଥିଲେ। ତେବେ ଆନ୍ଧ୍ରପଦେଶର ବିଭାଜନ ପରେ ଶ୍ରୀ ରାଓ ୱାଇଏସଆର କଂଗ୍ରେସରେ ଯୋଗ ଦେଇଥିଲେ। ୨୦୧୯ ସାଧାରଣ ନିର୍ବାଚନରେ ସେ ପ୍ରଥମ କରି ଲୋକସଭାକୁ ନିର୍ବାଚିତ ହୋଇଥିଲେ।
Popular Categories
Previous article
Next article