ଢାକା : ଏଠାରେ ଜିମ୍ବାୱେ ବିପକ୍ଷରେ ଚାଲିଥିବା ଦ୍ୱିତୀୟ କ୍ରିକେଟ ଟେଷ୍ଟରେ ଘରୋଇ ବାଂଲାଦେଶ ପ୍ରଥମ ଇନିଂସରେ ଆଗୁଆ ରହିଛି। ବାଂଲାଦେଶର ପ୍ରଥମ ଇନିଂସ ସ୍କୋର ୭/୫୨୨ ରନ (ପାଳି ସମାପ୍ତି ଘୋଷଣା) ଜବାବରେ ଜିମ୍ବାୱେ ତୃତୀୟ ଦିନ ଶେଷ ସୁଦ୍ଧା ପ୍ରଥମ ଇନିଂସରେ ୩୦୪ ରନରେ ଅଲଆଉଟ ହୋଇଛି। ଫଳରେ ବାଂଲାଦେଶ ପ୍ରଥମ ଇନିଂସରେ ୨୧୮ ରନରେ ଆଗୁଆ ରହିଛି।
ଜିମ୍ବାୱେ ପୂର୍ବଦିନ ସ୍କୋର ୧/୨୫ ରନରୁ ତୃତୀୟ ଦିନର ଖେଳ ଆରମ୍ଭ କରିଥିଲା। ମଧ୍ୟାହ୍ନ ଭୋଜନ ସୁଦ୍ଧା ଜିମ୍ବାୱେ ୩ ୱିକେଟ ହରାଇ ୧୦୦ ରନ କରିଥିଲା। ପୂର୍ବଦିନର ଦୁଇ ଅପରାଜିତ ବ୍ୟାଟସମ୍ୟାନ ଡୋନାଲଡ ତିରିପାନୋ ୮ ଓ ବ୍ରିୟାନ ଚାରି ୫୩ ରନ କରି ପ୍ୟାଭିଲିୟନ ଫେରିଯାଇଥିଲେ। ମଧ୍ୟକ୍ରମରେ ବ୍ରେଣ୍ଡନ ଟେଲର ଓ ପିଟର ମୁର୍ ବାଂଲାଦେଶ ବୋଲରଙ୍କ ଉଚିତ ମୁକାବିଲା କରିବା ଫଳରେ ଦଳୀୟ ସ୍କୋର ୩୦୦ ରନ ଅତିକ୍ରମ କରିଥିଲା। ଟେଲର ୧୦ଟି ଚୌକା ସହାୟତାରେ ୧୧୦ ଓ ମୁର୍ ୧୨ଟି ଚୌକା, ଗୋଟିଏ ଛକା ସହାୟତାରେ ୮୩ ରନ କରିଥିଲେ। ତେଣ୍ଡାଇ ଛତାରା ଆହତ ହୋଇଥିବାରୁ ବ୍ୟାଟିଂ କରିବାକୁ ଆସିନଥିଲେ। ବାଂଲାଦେଶ ପକ୍ଷରୁ ତାଇଜୁଲ ଇସଲାମ ସର୍ବାଧିକ ୫ଟି ଓ ମେହେଦି ହାସାନ ମିରାଜ ୩ଟି ୱିକେଟ ଅକ୍ତିଆର କରିଥିଲେ।
