ସୁଆଣ୍ଡୋ: ପୁରୀ ଜିଲ୍ଲା ସତ୍ୟବାଦୀ ବକୁଳବନରେ ଅଧିଷ୍ଠିତ ଶ୍ରୀ ଜଗନ୍ନାଥଙ୍କ ଅଜା ସିଦ୍ଧ ବଳରାମଙ୍କୁ ସ୍ନାନପୂର୍ଣ୍ଣିମାରେ ଶ୍ରଦ୍ଧାଳୁ ମାନେ ଦର୍ଶନ କରିଛନ୍ତି । ବ୍ରହ୍ମ ମୁହୂର୍ତ୍ତରେ ଠାକୁରଙ୍କୁ ମଙ୍ଗଳାର୍ପଣ, ନୂତନ ବସ୍ତ୍ର ପରିଧାନ, ଚନ୍ଦନବେଶ ଓ ଫୁଲ ଲାଗି ହେବା ପରେ ପୁଷ୍ପାଞ୍ଜଳି ଅର୍ପଣ କରାଯାଇଥିଲା । ସେବାୟତମାନେ ମନ୍ଦିର କୂଅରୁ ଜଳ ଆଣି ସେଥିରେ ଚନ୍ଦନ, କର୍ପୂର, କେଶର, ଜାଇଫଳ, ଦହି, ମହୁ, କ୍ଷୀର, ଗୋଲାପ ଜଳ, ତୁଳସୀ ଆଦି ନାନାଦି ସୁଗନ୍ଧି ପୁଷ୍ପ ପକାଇ ଠାକୁରଙ୍କୁ ୧୦୮ ଗଡୁଜଳରେ ସ୍ନାନ କରାଇଥିଲେ ।
ଏହାପରେ ଠାକୁର ବେଶ ହେବା ପରେ ଖେଚୁଡ଼ି ଭୋଗଲାଗି କରାଯାଇଥିଲା । ଠାକୁରଙ୍କୁ ବିଳମ୍ବିତ ରାତି ପର୍ଯ୍ୟନ୍ତ ଭକ୍ତମାନେ ଦର୍ଶନ କରିଥିଲେ । ସେହିପରି ସାକ୍ଷୀଗୋପାଳ ମନ୍ଦିରରେ ଶ୍ରୀ ସାକ୍ଷୀ ଗୋପିନାଥଙ୍କ ସ୍ନାନଯାତ୍ରା ଅନୁଷ୍ଠିତ ହୋଇଥିଲା । ରାଇପୁର ଜଗନ୍ନାଥ ମନ୍ଦିରରେ, ଗବକୁଣ୍ଡ ନୂଆନଈ ପାର୍ଶ୍ୱରେ ଥିବା ଜଗନ୍ନାଥ ମନ୍ଦିରରେ ସାରଙ୍ଗଯୋଡି ମଧୁବନ ଆଶ୍ରମରେ ପତିତପାବନ ମନ୍ଦିରରେ, ସୁଆଣ୍ଡୋ ବିନୋଦବିହାରୀଙ୍କ ମନ୍ଦିରରେ ପତିତପାବନଙ୍କ ଅଠେଇଶ ମନ୍ଦିର ସହିତ ବିଭିନ୍ନ ମଠ ମନ୍ଦିରରେ ରହିଥିବା ଶ୍ରୀ ଜଗନ୍ନାଥଙ୍କ ମହାପ୍ରଭୁଙ୍କ ସ୍ନାନପୂର୍ଣ୍ଣିମା ଯାତ୍ରା ଅନୁଷ୍ଠିତ ହୋଇଯାଇଛି।
