ଶ୍ରୀନଗର: ସିଆରପିଏଫ୍ ଗାଡ଼ି ଚାପାରେ ଆହତ ୩ ଜଣଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଛି। ସୁରକ୍ଷାକର୍ମୀଙ୍କ ବିରୋଧ କରୁଥିବା ବିକ୍ଷୋଭକାରୀଙ୍କ ଉପରେ ଗତ କାଲି ସିଆରପିଏଫ୍ ଯବାନ୍ଙ୍କୁ ନେଇ ଯାଉଥିବା ଏକ ଗାଡ଼ି ଚଢ଼ିଯାଇଥିଲା। ଏଥିରେ ତିନି ଜଣ ଆହତ ହୋଇଥିଲେ। ଆଜି ସେମାନଙ୍କ ମଧ୍ୟରୁ ଜଣଙ୍କ ମୃତ୍ୟୁ ଘଟିଛି। ଅମରନାଥ ଯାତ୍ରା ଆରମ୍ଭ ପୂର୍ବରୁ ସ୍ଥିତି ସମୀକ୍ଷା ପାଇଁ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂହଙ୍କ ଗସ୍ତ କାର୍ଯ୍ୟକ୍ରମ ପୂର୍ବରୁ ଉକ୍ତ ଘଟଣା ଘଟିଛି।
ଏହି ଘଟଣାର ଦୁଇଟି ଭିଡିଓ ଫୁଟେଜ୍ ମିଳିଛି। ଗୋଟିକରେ ବିକ୍ଷୋଭକାରୀମାନେ ସିଆରପିଏଫ୍ ଜିପ୍କୁ ଘେରି ଆକ୍ରମଣ କରୁଥିଲେ। ସେଠାରୁ ମୁଳୁଳିବାକୁ ଚେଷ୍ଟା କରୁଥିବା ବେଳେ ତିନି ଜଣଙ୍କ ଉପରେ ଜିପ୍ ଚଢ଼ିଯାଇଥିଲା। ଅନ୍ୟ ଏକ ଫୁଟେଜ୍ରେ ବିକ୍ଷୋଭକାରୀଙ୍କ ଉପରକୁ ଜିପ୍କୁ ଉଦେଶ୍ୟମୂଳକ ଭାବେ ଚଢ଼ାଇବାର ଉଦ୍ୟମ କରାଯାଉଥିବା ଦେଖିବାକୁ ମିଳିଛି। ବିକ୍ଷୋଭକାରୀଙ୍କୁ ଜିପ୍ ଚଢ଼ାଇ ଦମନ କରିବାକୁ ଅପଚେଷ୍ଟା କରାଯାଉଛି ବୋଲି ଓମାର ଅବଦୁ୍ଲ୍ଲା ଅଭିଯୋଗ କରିଛନ୍ତି।
