ରେଙ୍ଗାଲିକ୍ୟାମ୍ପ : ପାନୀୟ ଜଳ, ରାସ୍ତା ଆଉ ବିଦ୍ୟୁତ୍ ମଣିଷର ମୌଳିକ ଅଧିକାର । ଏହି ଅଧିକାରରୁ ଜଣେ ବି ବଞ୍ଚିତ ହେବେ ନାହିଁ ବୋଲି ନେତା ମନ୍ତ୍ରୀମାନେ ଭାଷଣ ଦେଉଥିବାବେଳେ ଅତାବିରା ବ୍ଲକ କୁଲୁଣ୍ଡା ପଞ୍ଚାୟତ ଅନ୍ତର୍ଗତ ବାଞ୍ଜିପାଲି ଗ୍ରାମର ରାଉତପଡ଼ାରେ ଏହାର ବିପରୀତ ଦୃଶ୍ୟ ଦେଖିବାକୁ ମିଳୁଛି । ଏଠାରେ ୫୦ରୁ ଉର୍ଦ୍ଧ୍ବ ଲୋକ ପ୍ରାୟ ୧୦୦ ବର୍ଷରୁ ଅଧିକ ହେବ ବସବାସ କରିଆସୁଛନ୍ତି । ଏମାନଙ୍କ ଜୀବନ ସଂଗ୍ରାମକୁ ନେଇ ଅନେକ ଥର ଅନେକ ଖବର କାଗଜରେ ଦୃଷ୍ଟି ନିକ୍ଷେପ କରାଯାଇଛି । ହେଲେ ସମସ୍ତେ ଯେମିତି ସ୍ଥାଣୁ ପାଲଟି ଯାଇଛନ୍ତି ଏହି ମାନଙ୍କ ପାଇଁ । ବ୍ଲକରୁ ମାତ୍ର ୫ କିମି ଦୂରରେ ରହିଛି ଏହି ପଡ଼ା । ପାନୀୟ ଜଳ ପାଇଁ ମୁକ ସାକ୍ଷୀ ପରି ରହିଛି ଗୋଟିଏ ଅଚଳ ନଳକୂପ ଯାହାକୁ ଦେଖି ସରକାର ବୋଧେ ନିଜକୁ ସାନ୍ତ୍ବନା ଦେଉଛନ୍ତି ତାଙ୍କର ବିକାଶ କରିଥିବା ନେଇ । ପଡ଼ାର ଏକ ବଦାନ୍ୟ ବ୍ୟକ୍ତିଙ୍କ ବଦାନ୍ୟତା ଯୋଗୁ ବୋଧେ ପଡ଼ାବାସୀ ବଞ୍ଚିରହିଛନ୍ତି । ତାଙ୍କର ଏକ ଖୋଲା କୂଅ ଉପରେ ସମସ୍ତେ ପାନୀୟ ଜଳ ପାଇଁ ବାଧ୍ୟ ହେଉଛନ୍ତି ।
ବର୍ଷା ଦିନରେ ଉକ୍ତ କୂଅର ପାଣି ଗୋଳିଆ ହୋଇଯାଏ । ଏହି ଗୋଳିଆ ପାଣି ପିଇ ପିଇ ପଡ଼ାର ଦୁଇଟି ଶିଶୁ ଝାଡ଼ା ବାନ୍ତିରେ ମୃତ୍ୟୁ ବରଣ କରିସାରିଛନ୍ତି । ସେତେବେଳେ ଏହି ଖବର ପାଇ ଡାକ୍ତରୀ ଦଳ ମଧ୍ୟ ପହଞ୍ଚି ଲୋକଙ୍କୁ ପରୀକ୍ଷା କରି ଦୂଷିତ ପାଣି ଯୋଗୁଁ ଝାଡା ବାନ୍ତି ହେଉଥିବା ଦର୍ଶାଇଥିଲେ । କିନ୍ତୁ ତାଙ୍କ ପାଇଁ କିଛି ବିକଳ୍ପ ନଥିବାରୁ ବାଧ୍ୟ ହୋଇ ପୁଣି ଆଜିଯାଏଁ କୂଅ ପାଣି ବ୍ୟବହାର କରୁଛନ୍ତି । ପୂର୍ବ ସରକାର ଥିବାବେଳେ ମାଟି ଖୋଲି ବଡ ବଡ଼ ପାଣି ପାଇପ ପୋତିଛନ୍ତି, କିନ୍ତୁ କେବଳ ଭସା ବାଦଲକୁ ଦେଖି କଣ ଚାତକର ଶୋଷ ମେଣ୍ଟି ଥାଏ ? ଯେଉଁଠି ଜଳର ବନ୍ୟା , ସେଇଠି ୨୪ ଘଣ୍ଟା ପାଣି ଯୋଗାଇ ଦିଆଯାଉଛି , କିନ୍ତୁ ଏଠି ମଣିଷ ପାଣି ଟୋପେ ପାଇଁ ନିଜ ଜୀବନକୁ ବାଜି ଲଗାଇଛନ୍ତି ।
ଖାଲି ଯେ ପାନୀୟ ଜଳ ପାଇଁ ପଡ଼ାବାସୀ ସଂଘର୍ଷ କରୁଛନ୍ତି ତା ନୁହେଁ, ରାସ୍ତା କଥା ତା ଠାରୁ ଆହୁରି ଦୁଃଖଦ । ବର୍ଷା ଦିନ ହେଲେ ଏହି ପଡ଼ାରୁ ଖଟରେ ରୋଗୀ ବୁହାହୋଇ ଡାକ୍ତରଖlନlକୁ ନିଆଯାଉଥିବା ଖବର ଅନେକ ଖବର କାଗଜର ମୁଖ୍ୟ ଖବର ପାଲଟିଥାଏ । ଏବେ ଚାଲିଛି ଆବାସ ଯୋଜନାର ସର୍ବେକ୍ଷଣ । ଏମିତି ଆଗରୁ ବି ଅନେକ ଥର ସର୍ବେକ୍ଷଣ ହୋଇସାରିଛି । ମାତ୍ର ଏତେ ବର୍ଷ ଭିତରେ ଦୁଇ ଜଣ ହିତାଧିକାରୀ ଘର ପାଇଛନ୍ତି । ଅନ୍ୟମାନେ ଆଜି ସୁଦ୍ଧା କେଉଁ କାରଣରୁ ହିତାଧିକାରୀର ଯୋଗ୍ୟତା ପାଇଁ ନାହାନ୍ତି ତାହା ସର୍ବେକ୍ଷଣକାରୀଙ୍କୁ ହିଁ ଜଣାଥିବ । ଘର, ପାଣି ଆଉ ରାସ୍ତା ପାଇଁ ପଡ଼ାବାସୀ ଅନେକ ଥର ପଞ୍ଚାୟତ ନିର୍ବାହୀ ଅଧିକାରୀ ଓ ସ୍ଥାନୀୟ ସରପଞ୍ଚଙ୍କୁ ଜଣାଇ ସାରିଛନ୍ତି, କିନ୍ତୁ କୌଣସି ଠୋସ ପଦକ୍ଷେପ ନିଆଯାଇନାହିଁ । ତେବେ ଦେଖାଯାଉ ଆଉ କେତେଦିନ ପରେ ଏହି ପଡ଼ାବାସୀଙ୍କ ଜୀବନ ସଂଗ୍ରାମର ପୁର୍ଣ୍ଣଛେଦ ପଡୁଛି ।
Comments are closed.