ଲକ୍ଷ୍ନୌ : ଉତ୍ତରପ୍ରଦେଶ ରାଜ୍ୟସଭା ନିର୍ବାଚନରେ ବହୁ ଜନ ସମାଜବାଦୀ ପାର୍ଟି (ବସପା)କୁ ସମର୍ଥନ ଦେବାକୁ କଂଗ୍ରେସ ଘୋଷଣା କରିଛି । ବିଧାନସଭାରେ ବିଏସ୍ପି ବିଧାୟକ ଦଳ ନେତା ଲାଲଜୀ ବର୍ମାଙ୍କ ସହ ସାକ୍ଷାତକାର ପରେ ରାଜ୍ୟ କଂଗ୍ରେସ ବିଧାୟକ ଦଳ ନେତା ଅଜୟ କୁମାର ଦଳୀୟ ନିଷତ୍ତିର ଘୋଷଣା କରିଥିଲେ ।
ପ୍ରକାଶ ଯେ ମାର୍ଚ୍ଚ ୨୩ରେ ଉତ୍ତରପ୍ରଦେଶର ୧୦ ରାଜ୍ୟସଭା ଆସନ ପାଇଁ ମତଦାନ ଗ୍ରହଣ କରାଯିବ । ସଂଖ୍ୟାଗରିଷ୍ଠତା ଦୃଷ୍ଟରୁ ଶାସକ ବିଜେପି ନିଜର ୮ ପ୍ରାର୍ଥୀଙ୍କୁ ରାଜ୍ୟସଭାକୁ ପଠାଇ ପାରିବ । ସେହିପରି ବିଏସ୍ପି ଏବଂ ଏସପି ନିଜର ଗୋଟିଏ ଲେଖାଏଁ ପ୍ରାର୍ଥୀଙ୍କୁ ରାଜ୍ୟସଭାକୁ ପଠାଇ ପାରିବେ । ପୂର୍ବରୁ ଏସ୍ପି ଜୟା ବଚନଙ୍କୁ ଏବଂ ବିଏସ୍ପି ଭୀମରାଓ ଆମ୍ବେଦକରଙ୍କୁ ରାଜ୍ୟସଭା ପ୍ରାର୍ଥୀ ଘୋଷଣା କରିଛନ୍ତି ।
ବର୍ତ୍ତମାନ ବିଧାନସଭା ସ୍ଥିତିକୁ ଅନୁଧ୍ୟାନ କଲେ ବିଏସପି ପାଖରେ ୧୯ ବିଧାୟକ ଅଛନ୍ତି ଓ କଂଗ୍ରେସ ପାଖରେ ୭ ସଦସ୍ୟ ଅଛନ୍ତି । କଂଗ୍ରେସ ବିଧାୟକ ଦଳ ନେତା ଅଜୟ କୁମାର କହିଛନ୍ତି ଯେ କଂଗ୍ରେସ ଲୋକସଭାରେ ସବୁଠୁ ବଡ଼ ବିରୋଧୀ ଦଳ ରହିଛି । ବିରୋଧୀ ଦଳଙ୍କୁ ବିଜେପି ବିରୁଦ୍ଧରେ ଏକାଠି ହେବାକୁ ଦଳ ଆହ୍ୱାନ ଜଣାଇଛି, ଏଥିରେ କିଛି ଦଳ ରାଜି ନାହାନ୍ତି । ଏଥିପାଇଁ ରାଜ୍ୟସଭା ନିର୍ବାଚନରେ ବିଏସ୍ପି ପ୍ରାର୍ଥୀଙ୍କୁ କଂଗ୍ରେସ ସମର୍ଥନ ଜଣାଇବାକୁ ନିଷ୍ପତ୍ତି ନେଇଛି ।
