ମୁମ୍ବଇ : ଗୁଜରାଟ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କୁ ନ ଭେଟିବା ଏକ ଭୁଲ ଥିଲା । ଏହି ନିର୍ବାଚନ ପୂର୍ବରୁ ରାହୁଲଙ୍କ ସହ ସେ ମିଶିଥିଲେ ଗୁଜରାଟରେ ବିଜେପି ଶାସନକୁ ଆସିନଥାନ୍ତା ବୋଲି ପାଟିଦାର ନେତା ହାର୍ଦ୍ଦିକ ପଟେଲ ମତବ୍ୟକ୍ତ କରିଛନ୍ତି ।
ପାଟିଦାର ସଂରକ୍ଷଣ ଦାବି ନେଇ ରାଜନୀତିରେ ପ୍ରବେଶ କରିଥିବା ୨୪ ବର୍ଷିୟ ପାଟିଦାର ନେତା ହାର୍ଦ୍ଦିକ ପଟେଲଙ୍କ କହିବା ଅନୁସାରେ ନିର୍ବାଚନ ପୂର୍ବରୁ ରାହୁଲ ଓ ତାଙ୍କ ମଧ୍ୟରେ ବୈଠକ ହୋଇଥିଲେ; ଗୁଜରାଟରେ କଂଗ୍ରେସ ସଂଖ୍ୟା ଗରିଷ୍ଠତା ହାସଲ କରିଥାନ୍ତା ଓ ସରକାର ଗଢିଥାନ୍ତା । ମୁମ୍ବଇର ଏକ କାର୍ଯ୍ୟକ୍ରମରେ ଯୋଗଦେବା ଅବସରରେ ହାର୍ଦ୍ଦିକ ଏହି ମତବ୍ୟକ୍ତ କରିଛନ୍ତି । ଯଦି ସେ ନିର୍ବାଚନ ପୂର୍ବରୁ କଂଗ୍ରେସ ଅଧ୍ୟକ୍ଷ ରାହୁଲଙ୍କୁ ଭେଟିଥାନ୍ତେ, ତେବେ ଗୁଜରାଟରେ ବିଜେପି ୭୯ରୁ ଅଧିକ ଆସନ ଜିତିପାରିନଥାନ୍ତା ।
ପ୍ରକାଶ ଯେ ଗତବର୍ଷ ଡିସେମ୍ବର ମାସରେ ଅନୁଷ୍ଠିତ ଗୁଜରାଟ ବିଧାନସଭା ନିର୍ବାଚନରେ ବିଜେପି ୧୮୨ ଆସନରୁ ୯୯ ଆସନରେ ବିଜୟ ହାସଲ କରି ସରକାର ଗଢିବାରେ ସକ୍ଷମ ହୋଇଛି । ମତଦାନର କିଛି ଦିନ ପୂର୍ବରୁ ହାର୍ଦ୍ଦିକ କଂଗ୍ରେସକୁ ଖୋଲାଖୋଲି ସମର୍ଥନ ଦେଇଥିଲେ । ଏପରିକି ଗୁଜରାଟର ଜଣେ ବରିଷ୍ଠ ପ୍ରଶାସକ ପାଟିଦାର ଆନ୍ଦୋଳନରୁ ଓହରିଯିବା ପାଇଁ ତାଙ୍କୁ ୧,୨୦୦ କୋଟି ଟଙ୍କା ଲାଞ୍ଚ ଯାଚୁଥିଲେ ବୋଲି ହାର୍ଦ୍ଦିକ ପୂର୍ବ ଅଭିଯୋଗକୁ ଦୋହରାଇଛନ୍ତି ।