ଜୟପୁର : ‘ଅତ୍ୟନ୍ତ ପଛୁଆ ବର୍ଗ’ (ଏମ୍ବିସି) ମାନ୍ୟତା ପ୍ରଦାନ ସହ ଚାକିରି ଓ ଅନ୍ୟାନ୍ୟ କ୍ଷେତ୍ରରେ ସଂରକ୍ଷଣ ଦାବିରେ ରାଜସ୍ଥାନରେ ଗୁଜ୍ଜର ସମ୍ପ୍ରଦାୟର ଆନ୍ଦୋଳନ ବ୍ୟାପକ ହୋଇଛି। ସୋମବାର ଭରତପୁରଠାରେ ରେଳପଥ ଅବରୋଧ କରାଯାଇଛି। ଏହି ସମ୍ପ୍ରଦାୟର ଲୋକେ ରେଳ ଧାରଣା ଉପରେ ବିକ୍ଷୋଭ ପ୍ରଦର୍ଶନ କରିବା ଦ୍ବାରା ଦିଲ୍ଲୀ-ମୁମ୍ବଇ ଓ ଆଗ୍ରା-ଜୟପୁର ଲାଇନ୍ରେ ରେଳ ଓ ବସ୍ ଚଳାଚଳ ଗୁରୁତର ବାଧାପ୍ରାପ୍ତ ହୋଇଛି। ବିକ୍ଷୋଭକାରୀ ଦାବି ପୂରଣ ପର୍ଯ୍ୟନ୍ତ ଆନ୍ଦୋଳନ ଅବ୍ୟାହତ ରଖିବେ ବୋଲି ଗୁଜ୍ଜର ସମ୍ପ୍ରଦାୟର ନେତା ବିଜୟ ବୈଂଶଲ ଘୋଷଣା କରିଛନ୍ତି।
ଏହାକୁ ଦୃଷ୍ଟିରେ ରଖି ରେଳବାଇ ପକ୍ଷରୁ ୩ ରେଳ ଚଳାଚଳକୁ ବାତିଲ କରାଯିବା ସହ ୨୯ ଗାଡ଼ି ଗତିପଥ ପରିବର୍ତ୍ତନ କରାଯାଇଛି। ଆନ୍ଦୋଳନ ଯୋଗୁଁ ୧୦ରୁ ଅଧିକ ଜିଲାରେ ପ୍ରଶାସନ ପକ୍ଷରୁ ଜାତୀୟ ସୁରକ୍ଷା ଆଇନ (ଏନ୍ଏସ୍ଏ) ପଲାଗୁ କରାଯାଇଛି। ମୋବାଇଲ ଓ ଇଣ୍ଟରନେଟ ନେଟୱର୍କ ବାତିଲ କରାଯାଇଛି। ଆଉ କେତେକ ଅଞ୍ଚଳରେ ୧୪୪ ଧାରା ଜରି କରାଯାଇଛି। ଦାବି ଉପରେ ବିଚାରବିମର୍ଶ ପାଇଁ ସରକାର ଗତ ୨୯ରେ କ୍ୟାବିନେଟ ବୈଠକ ଡକାଇ ଆଲୋଚନା କରିଥିଲେ; କିନ୍ତୁ ଡାକରା ସତ୍ତ୍ବେ ଏଥିରେ ଗୁଜ୍ଜର ନେତାମାନେ ଯୋଗ ଦେଇ ନ ଥିଲେ। ଇତିମଧ୍ୟରେ ସରକାର ସେମାନଙ୍କର ତିନିଟି ଦାବି ପୂରଣ କରିଥିଲେ ମଧ୍ୟ ସଂରକ୍ଷଣ ପ୍ରସଙ୍ଗରେ ନିଷ୍ପତ୍ତି ନେଇ ନାହାନ୍ତି। ସରକାରଙ୍କ ନିଷ୍ପତ୍ତ ଯଥେଷ୍ଟ ନୁହେଁ ବୋଲି ବୈଂଶଲ କହିଛନ୍ତି।
Comments are closed.