ଭୁବନେଶ୍ୱର : ରାଜ୍ୟ ସରକାରଙ୍କ ପକ୍ଷରୁ ୧୧ଟି ଜିଲାରେ ଶନିବାର ଓ ରବିବାର ଦୁଇଦିନ ସଟ୍ଡାଉନ୍ ଘୋଷଣା କରାଯାଇଛି। ଅତ୍ୟାବଶ୍ୟକ ସେବା ଛାଡ଼ି ଦେଲେ ଅନ୍ୟ ସବୁ ବନ୍ଦ ରଖିବାକୁ ନିର୍ଦେଶ ଦିଆଯାଇଛି। ଓଡ଼ିଆଙ୍କ ଗଣପର୍ବ ରଜ ରବିବାରଠାରୁ ଆରମ୍ଭ ହେବ ଓ ମଙ୍ଗଳବାରରେ ଶେଷ ହେବ। ଏହି ତିନି ଦିନିଆ ପର୍ବକୁ ପାଳନ କରିବା ପାଇଁ ଆରମ୍ଭ ହୋଇଯାଇଛି ପ୍ରସ୍ତୁତି। ବିଶେଷ କରି ଅବିଭକ୍ତ ପୁରୀ, କଟକ ଓ ବାଲେଶ୍ୱର ଜିଲାରେ ରଜ ଉତ୍ସବକୁ ଧୁମ୍ଧାମରେ ପାଳନ କରାଯାଉଛି। ତେବେ ସଟ୍ଡାଉନ୍ ଯୋଗୁ ପହିଲି ରଜ ପାଳନରେ ଫିକା ପଡ଼ିବା ଆଶଙ୍କା ରହିଛି। ତେବେ ଆଜି ଦୋକାନ ବଜାର ଖୋଲିବା ପରେ ବିଭିନ୍ନ ବ୍ୟବସାୟିକ ପ୍ରତିଷ୍ଠାନ ପକ୍ଷରୁ ରଜ ପାଇଁ ସ୍ୱତନ୍ତ୍ର ଅଫର ଦିଆଯାଇଥିଲା। ରଜ ପର୍ବ ପାଳନ ପାଇଁ ଆଜିଠୁ ଜିନିଷ କିଣାବିକା ଆରମ୍ଭ ହୋଇଯାଇଛି। ଭୁବନେଶ୍ୱର, କଟକ, ପୁରୀ, ଖୋର୍ଦ୍ଧା, ବାଲେଶ୍ୱର, ଭଦ୍ରକ, ଯାଜପୁର ଆଦି ସହରରେ ବ୍ୟବସାୟିକ ପ୍ରତିଷ୍ଠାନଗୁଡ଼ିକରେ ଆଜି ପ୍ରବଳ ଭିଡ଼ ପରିଲକ୍ଷିତ ହୋଇଥିଲା। ଭିଡ଼ ନିୟନ୍ତ୍ରଣ ପାଇଁ ପୁଲିସକୁ ବହୁ ସମସ୍ୟାର ସମ୍ମୁଖୀନ ହେବାକୁ ପଡ଼ିଥିଲା। ଲୋକେ କରୋନା କଟକଣା ଭୁଲିଯିବା ସହିତ କିଏ ଆଗ ଜିନିଷ କିଣିବ ସେଥିନେଇ ଏକ ପ୍ରକାର ପ୍ରତିଯୋଗିତା ଚାଲିଥିଲା। ଅଧିକାଂଶ ଲୋକ ସାମାଜିକ ଦୂରତା ବଜାୟ ରଖି ନ ଥିବାବେଳେ ଅନେକ ମାସ୍କ ପିନ୍ଧି ନ ଥିବା ଦେଖିବାକୁ ମିଳିଥିଲା। ଫଳରେ ରଜ ପ୍ରସ୍ତୁତି ପାଇଁ ଏଭଳି ଭିଡ଼ ପ୍ରଶାସନ ପାଇଁ ଚିନ୍ତା ବଢ଼ାଇ ଦେଇଛି। କରୋନା ମହାମାରୀ ପ୍ରତିହତ ପାଇଁ କଡ଼ା ଆଭିମୁଖ୍ୟ ଗ୍ରହଣ କରାଯାଇଥିବାବେଳେ ଜିନିଷ କିଣିବା ଲାଗି ଲୋକେ ଯେଭଳି ଗହଳି କରୁଛନ୍ତି ତାକୁ କିଭଳି ନିୟନ୍ତ୍ରଣ କରାଯିବ ସେଥିନେଇ ବ୍ୟାପକ ବିଚାର ବିମର୍ସ ଚାଲିଛି। ବୁଧବାର, ଗୁରୁବାର ଓ ଶୁକ୍ରବାର ତିନିଦିନ ଦୋକାନବଜାର ଖୋଲା ରହିବ। ଏସବୁ ଦିନଗୁଡ଼ିକରେ ରଜ ବ୍ୟବସାୟ ଖୁବ୍ ଜମିବ ଏବଂ ଲୋକେ ଭିଡ଼ ଜମାଇବେ। କରୋନା ସଂକ୍ରମଣ ରୋକିବା ପାଇଁ ସରକାର ଜାରି କରିଥିବା ନିର୍ଦେଶନାମା ପାଳନ କରିବା ଜରୁରୀ। ଜନସାଧାରଣ କରୋନା କଟକଣା ମାନି ଜିନିଷ କିଣାକିଣି କରିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି।
Popular Categories
Previous article
Next article