ମୁଜାଫରନଗର : ଉତ୍ତରପ୍ରଦେଶ ସାହାରାନପୁର ଜିଲାସ୍ଥିତ ସୈଖ-ଉଲ-ହିନ୍ଦ ମୌଲାନା ମହମୁଦ ହାସନ ମେଡିକାଲ କଲେଜ ଛାତ୍ରାବାସରେ ରାଗିଂ ଅଭିଯୋଗରେ ୫୨ ଜଣ ଛାତ୍ରଙ୍କୁ କଲେଜରୁ ଗୋଟିଏ ମାସ ଓ ଛାତ୍ରାବାସରୁ ୬ ମାସ ପାଇଁ ନିଲମ୍ବନ କରାଯାଇଛି। କଲେଜ ଅଧ୍ୟକ୍ଷ ଅରବିନ୍ଦ ତ୍ରିବେଦୀ କହିଛନ୍ତି ଯେ ରାଗିଂ ଅଭିଯୋଗର ତଦନ୍ତ କରାଯାଇଥିଲା ଓ ୫୨ ଜଣ ଛାତ୍ର ଏଥିରେ ସଂପୃକ୍ତ ଥିବା ଜଣାପଡ଼ିଥିଲା। ସେହି ଅନୁସାରେ କାର୍ଯ୍ୟାନୁଷ୍ଠାନ ନିଆଯାଇଛି ଓ ବୁଧବାର ୫୨ ଛାତ୍ରଙ୍କୁ ନିଲମ୍ବନ କରାଯାଇଛି। ୨୦୧୬-୨୦୧୭ ବ୍ୟାଚ୍ର ଛାତ୍ରମାନେ ଛାତ୍ରାବାସରେ ରହୁଥିବା କନିଷ୍ଠ ଛାତ୍ରଙ୍କୁ ରାଗିଂ କରିଥିବା ଅଭିଯୋଗ ହୋଇଥିଲା। ସେମାନେ କନିଷ୍ଠ ବର୍ଗର ଛାତ୍ରଙ୍କ ଚୁଟି କାଟିଦେବା ସହ ମାଡ଼ ମାରିଥିଲେ। ରାଗିଂ ନିରୋଧ କମିଟି ଏହାର ତଦନ୍ତ କରିଥିଲା ଓ ଅଭିଯୋଗ ସତ୍ୟ ବୋଲି ଜଣାପଡିଥିଲା। ବୁଧବାର ଦୋଷୀ ସାବ୍ୟସ୍ତ ଛାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି।
