ପୁରୀ: ଶ୍ରୀମନ୍ଦିର ଗର୍ଭଗୃହ ଫଟୋ ଓ ଭିଡିଓ ଭାଇରାଲ ହେବା ଘଟଣାରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ସିଂହଦ୍ୱାର ଥାନାରେ ଏତଲା ଦିଆଯାଇଛି । ଭିଡିଓ ଓ ଫଟୋ ଭାଇରାଲ କରିଥିବା ୟୁଟ୍ୟୁବର ଯୁବକଙ୍କ ନାଁରେ ଥାନାରେ ଏତଲା ଦେଇଛନ୍ତି ସୁରକ୍ଷା ପ୍ରଶାସକ । ଯୁବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି । ସୂଚନା ଥାଉ କି, ଗତକାଲି ସୋସିଆଲ ମିଡ଼ିଆରେ ଶ୍ରୀମନ୍ଦିର ଗର୍ଭଗୃହ ଏବଂ ରତ୍ନ ସିଂହାସନରେ ଶ୍ରୀଜଗନ୍ନାଥଙ୍କ ଫଟୋ ଭାଇରାଲ ହୋଇଥିବା ନେଇ ଜଣାପଡ଼ିଥିଲା । ଏହି ଫଟୋ ଫେସବୁକରେ ପୋଷ୍ଟ କରିଥିଲେ ଆକାଶ ଚୌଧୁରୀ ନାମକ ଜଣେ ଯୁବକ । ଫଟୋ ପୋଷ୍ଟ ସହ ବଙ୍ଗଳା ଭାଷାରେ ଶ୍ରୀଜଗନ୍ନାଥ ଆକାଶ ଲେଖିଥିବା ଦେଖିବାକୁ ମିଳିଥିଲା । ଫଟୋ ଭାଇରାଲ ପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ତଦନ୍ତ ଆରମ୍ଭ କରାଯାଇଥିଲା । ହେଲେ ବର୍ତ୍ତମାନ ଘଟଣାରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ସିଂହଦ୍ୱାର ଥାନାରେ ଏତଲା ଦିଆଯାଇଛି । ଶ୍ରୀମନ୍ଦିର ଭିତରକୁ କିପରି କ୍ୟାମେରା ଗଲା ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
Comments are closed.