ଡେସ୍କ : ପୁରୀ ବଡଦାଣ୍ଡ ମରଚିକୋଟ ଛକରେ ଲକ୍ଷ୍ମୀ ମାର୍କେଟ୍ କମ୍ପ୍ଲେକ୍ସରେ ଥିବା ସମ୍ରାଟ ହୋଟେଲରେ ଲାଗିଥିବା ନିଆଁ ଏବେ ମଧ୍ୟ ଲିଭିନି । ଦୀର୍ଘ ୧୬ ଘଣ୍ଟା ଧରି ଅଗ୍ନିଶମ କର୍ମଚାରୀ ନାକେଦମ୍ ହେଲେଣି । ସମଗ୍ର ପୁରୀ ସହର ଧୂଆଁମୟ ହୋଇପଡିଛି। ମାର୍କେଟ କମ୍ପ୍ଳେକ୍ସର ପାଚେରୀ ନଥିବା ଓ ପ୍ରବେଶ ଏବଂ ପ୍ରସ୍ଥାନ ଲାଗି ଏକମାତ୍ର ସଂକୀର୍ଣ୍ଣ ରାସ୍ତା ଥିବାରୁ ନିଆଁକୁ ନିୟନ୍ତ୍ରଣ କରିବା କଷ୍ଟକର ହୋଇପଡିଛି । ଓଡ୍ରାଫ୍ ଟିମ୍ଙ୍କ ସମେତ ଅଗ୍ନିଶମ ସେବା ସଂସ୍ଥାର ପ୍ରାୟ ୧୫୦ ଜଣ କର୍ମଚାରୀ ଏହି ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଛନ୍ତି। ୧୨ରୁ ଅଧିକ ଅଗ୍ନିଶମ ଗାଡ଼ି ନିଆଁ ଲିଭା କାର୍ଯ୍ୟରେ ଲାଗିଛନ୍ତି। କଟକ ଓ ଭୁବନେଶ୍ୱରରୁ ଷ୍ଟ୍ରାଇକିଂ ଫୋର୍ସ ଆସି ନିଆଁ ଲିଭା କାର୍ଯ୍ୟରେ ଲାଗିଥିବା ଜଣାପଡିଛି।
ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ଓ ଅଗ୍ନିଶମ ଡିଜି ସନ୍ତୋଷ ଉପାଧ୍ୟୟ ପୁରୀରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି ।ପୁରୀ ଏସ୍ପି କେ.ବିଶାଲ ସିଂହ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିବା ଦିଗରେ ପଦକ୍ଷେପ ଗ୍ରହଣ କରୁଛନ୍ତି । ଅନ୍ୟ ପକ୍ଷରେ ନିଆଁ ଲିଭାଇବା ବେଳେ ଆହତ ହୋଇଥିବା ଅଗ୍ନିଶମ ବାହିନୀର ୩ ଜଣ କର୍ମଚାରୀଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ଜିଲ୍ଲା ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସେମାନଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସିଥିବା ଜଣାପଡିଛି ।
ମାର୍କେଟ୍ କମ୍ପ୍ଲେକ୍ସର ତଳ ମହଲାରେ ଥିବା ଏକ ଲୁଗା ଦୋକାନରେ ବୁଧବାର ରାତି ୮ଟାରେ ସଟ୍ ସର୍କିଟ୍ ହୋଇ ନିଆଁ ଲାଗିବା ପରେ ତାହା ଉପର ମହଲାକୁ ବ୍ୟାପୀ ଯାଇଥିଲା । ଦ୍ୱିତୀୟ ମହଲାରେ ଥିବା ଏକ ବ୍ୟାଙ୍କ ଓ ଲୁଗା ଦୋକାନରେ ନିଆଁ ଲାଗିଥିଲା।ଉପର ମହଲରୁ ଏବେ ବି ପର୍ଯ୍ୟାପ୍ତ ପରିମାଣର ଧୂଆଁ ବାହାରୁଛି। ନିଆଁ ଲିଭାଇବା ଲାଗି ନିୟୋଜିତ କର୍ମଚାରୀଙ୍କୁ ନାକେଦମ୍ ହେବାକୁ ପଡିଛି । ଏମେ ମଧ୍ୟ ସ୍ଥିତି ଅଣାୟତ୍ତ ହୋଇ ରହିଛି।
