ବେଗୁନିଆ: ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ କଂଗ୍ରେସ କମିଟି ପକ୍ଷରୁ ପେଟ୍ରୋଲ, ଡିଜେଲ, ଗ୍ୟାସ ସହିତ ଅତ୍ୟାବଶ୍ୟକୀୟ ସାମଗ୍ରୀର ଅହେତୁକ ଦର ବୃଦ୍ଧି ପ୍ରତିବାଦରେ ଆଜି ଗଣଧାରଣା ସହିତ ବିକ୍ଷୋଭ କରାଯାଇଥିଲା। ବ୍ଲକ କଂଗ୍ରେସ କମିଟି ସଭାପତି ହାଡୁବନ୍ଧୁ ମହାପାତ୍ର ଏବଂ କଂଗ୍ରେସ ବିଧାୟକ ପ୍ରାର୍ଥୀ ପ୍ରଦୀପ କୁମାର ସାହୁ ନେତୃତ୍ବରେ ବେଗୁନିଆ ପୋଷ୍ଟ ଅଫିସ ଛକରୁ ଏକ ରାଲି ବାହାରି ବଜାର ପରିକ୍ରମା କରି ବେଗୁନିଆ ବ୍ଲକ ସମ୍ମୁଖରେ ବିକ୍ଷୋଭ କରିଥିଲେ । ଏହି ବିକ୍ଷୋଭରେ ସ୍ୱତନ୍ତ୍ର ଅତିଥି ଭାବେ ଜଟଣୀ ବିଧାୟକ ସୁରେଶ କୁମାର ରାଉତରାୟ ଯୋଗ ଦେଇ ଦେଶରେ କରୋନା ମହାମାରୀର ତାଣ୍ଡବ ଲୀଳା ଚାଲିଥିବାବେଳେ ଏବଂ ଲୋକମାନେ ରୋଜଗାର ଶୂନ୍ୟ ହୋଇ ଘରେ ବସିଥିବାବେଳେ କେନ୍ଦ୍ରସରକାର ବୋଝ ଉପରେ ଲଳିତା ବିଡ଼ା ସଦୃଶ ପେଟ୍ରୋଲ, ଡିଜେଲ, ଗ୍ୟାସ ଏବଂ ଅତ୍ୟାବଶ୍ୟକୀୟ ସାମଗ୍ରୀ ଉପରେ ଅଯଥା ଦୈନିକ ଅତ୍ୟଧିକ ଟିକସ ବୃଦ୍ଧି କରି ଜନସାଧାରଣଙ୍କୁ ଶୋଷଣ କରୁଛନ୍ତି । ତୈଳ ଦର ବୃଦ୍ଧି ଏକଶତ ଟଙ୍କାରୁ ଅଧିକ ହେବା ଯୋଗୁଁ ଦେଶରେ ଆବଶ୍ୟକୀୟ ନିତ୍ୟବ୍ୟବହାର୍ୟ ସାମଗ୍ରୀ ଖାଇବା ତେଲ, ପନିପରିବା ଆଦି ସମସ୍ତ ଜିନିଷର ଦର ଆକାଶଛୁଆଁ ହୋଇଛି । ଗରୀବ ଖଟିଖିଆ ଓ ନିମ୍ନ ମଧ୍ୟବିତ୍ତ ପରିବାରର ଗୁଡିକ ଏଥିରେ ବେଶି କ୍ଷତିଗ୍ରସ୍ତ ହେଉଛନ୍ତି । କେନ୍ଦ୍ର ସରକାରଙ୍କର କେନ୍ଦ୍ରୀୟ ଟିକସ ହ୍ରାସ କରି ଅତିଶୀଘ୍ର ପେଟ୍ରୋଲ, ଡିଜେଲ ଏବଂ ଗ୍ୟାସ ଦରକୁ ହ୍ରାସ କରିବା ପାଇଁ ଗଣଧାରଣାରେ ଦାବି କରାଯାଇଥିଲା ।
ଆଜିର ଏହି କାର୍ୟ୍ୟକ୍ରମରେ ବହୁ କଂଗ୍ରେସ କର୍ମୀ ଯୋଗଦେଇ କେନ୍ଦ୍ର ସରକାରଙ୍କ ଦରଦାମ ବୃଦ୍ଧି ପ୍ରତ୍ୟାହାର କରିବା ପାଇଁ ଗଣଧାରଣାରେ ସାମିଲ ହୋଇ ପ୍ରତିବାଦ କରିଥିଲେ ।
