ରାଉରକେଲା : ‘ଚାକିରି ପଛରେ ଧାଇଁ ଧାଇଁ ବୟସ ସରିଗଲା। ପ୍ରତିଭା ମରିଗଲା । ପଡ଼ିଆ ଛାଡ଼ି ଶେଷରେ ପରିବାର ପାଇଁ ଅଣ୍ଟା ଭିଡ଼ିଲି। ଏବେ ପକୁଡ଼ି, ମାଲପୁଆ ଛାଣୁଛି । ଏଥିରେ କଷ୍ଟେମଷ୍ଟେ ପରିବାର ଚଳିଯାଉଛି। ବହୁ ପଦକ, ପ୍ରଶଂସା ସହ ପ୍ରମାଣପତ୍ରରେ କ’ଣ ପେଟ ପୂରିବ’ । ଏ ହେଉଛି ଜଣେ ପ୍ରତିଭାସମ୍ପନ୍ନ ଭେଟେରାନ ଜାତୀୟ କ୍ରୀଡ଼ାବିତ୍ଙ୍କ କରୁଣ କାହାଣୀ । ପାୱାରଲିଫ୍ଟରରେ ଜାତୀୟସ୍ତରରେ ସ୍ବର୍ଣ୍ଣପଦକ ଜିଣିବାର ଗୌରବ ଅର୍ଜନ କରିଛନ୍ତି। ରାଜ୍ୟସ୍ତରରେ ମଧ୍ୟ ପାୱାରଲିଫ୍ଟିଂ (ଭାରୋତ୍ତଳନ)ରେ ବହୁ ସଫଳତା ଅର୍ଜନ କରିଛନ୍ତି । ଏଭଳି ଜଣେ ପ୍ରତିଭାବାନ ଆଥଲେଟ ସରକାରୀ ପ୍ରୋତ୍ସାହନ ଅଭାବରୁ ଆଜି ଦୁର୍ଦ୍ଦିନରେ ଦିନ କାଟୁଛନ୍ତି। ସ୍ମାର୍ଟସିଟିର ଇସ୍ପାତ ଗଜପତି ମାର୍କେଟରେ ନିଜ ପେଟପାଟଣା ଓ ପରିବାର ପ୍ରତିପୋଷଣ ପାଇଁ ଏକ ଗୁମୁଟି କରି ପକୁଡ଼ି ଓ ମାଲପୁଆ ଛାଣୁଛନ୍ତି ।
ଗଞ୍ଜାମ ଜିଲା ଖଲିକୋଟ ବ୍ଲକ ବିକ୍ରମପୁର ଅଞ୍ଚଳର ସୁରେନ୍ଦ୍ର ନାୟକ ଯୁବାବସ୍ଥାରେ ରାଉରକେଲାକୁ ଚାଲି ଆସିଥିଲେ । ବୟସ ଏବେ ୬୫ ଛୁଇଁଲାଣି । ସମ୍ପ୍ରତି ସେକ୍ଟର ୩ ଅଟୋ କଲୋନୀରେ ସେ ପରିବାର ସହ ରହୁଛନ୍ତି । ପରିବାର କହିଲେ ଗୋଟିଏ ପୁଅ, ଗୋଟିଏ ଝିଅ ଓ ସ୍ତ୍ରୀକୁ ନେଇ ତାଙ୍କ ସୁନା ସଂସାର । ପୁଅ, ଝିଅ ବାହା ହୋଇସାରିଲେଣି । ଭାର ପାୱାରଲିଫ୍ଟରରେ ରୁଚି ରଖିଥିବା ସୁରେନ୍ଦ୍ର ପାୱାର ଲିଫ୍ଟିଂ ସହ ବଡି ବିଲ୍ଡିଂରେ ମଧ୍ୟ ଦକ୍ଷତା ଦେଖାଇଥିଲେ । ୧୯୮୧ରୁ କ୍ରୀଡ଼ା ଜୀବନ ଆରମ୍ଭ କରିଥିବା ସୁରେନ୍ଦ୍ର ରାଜ୍ୟର ବିଭିନ୍ନ ସ୍ଥାନରେ ଆୟୋଜିତ ରାଜ୍ୟସ୍ତରୀୟ ପାୱାରଲିଫ୍ଟିଂ ପ୍ରତିଯୋଗିତାରେ ପାଞ୍ଚଥର ସ୍ବର୍ଣ୍ଣପଦକ ବିଜେତା ହେବାର ଗୌରବ ଅର୍ଜନ କରିଛନ୍ତି । ଓଡ଼ିଶା ପାୱାରଲିଫ୍ଟିଂ ଆସୋସିଏସନ ଓ ଭାରତ ପାୱାରଲିଫ୍ଟିଂ ଫେଡେରେସନ ପକ୍ଷରୁ ଅନେକବାର ପ୍ରଶଂସିତ ହୋଇଛନ୍ତି ସୁରେନ୍ଦ୍ର। ରାଜ୍ୟସ୍ତରୀୟ ପ୍ରତିଯୋଗିତାରେ ବହୁବାର ସଫଳତା ଅର୍ଜନ କରିଥିବା ସୁରେନ୍ଦ୍ର ଜାତୀୟସ୍ତରରେ ମଧ୍ୟ ପାୱାରଲିଫ୍ଟିଂରେ ଚମକ ଦେଖାଇ ନିଜ ମାଟି ପାଇଁ ଗୌରବ ଆଣିଛନ୍ତି । ୧୯୯୨ରେ ଅର୍ଥାଭାବ ଓ ପ୍ରୋତ୍ସାହନରୁ କ୍ରୀଡ଼ାଭୂମି ଛାଡ଼ିବାକୁ ବାଧ୍ୟ ହୋଇଥିଲେ । ଚାକିରି ପଛରେ ଦୌଡ଼ିଦୌଡ଼ି ବିଫଳ ହେବା ପରେ ବ୍ୟବସାୟ ପାଇଁ ଅଣ୍ଟା ଭିଡ଼ିଲେ । ପ୍ରଥମେ ବୁଲିବୁଲି ପାନ ମସଲା ବିକ୍ରି କଲେ । ପରେ ଅଣ୍ଡା ବ୍ୟବସାୟ ପ୍ରତି ମନ ବଳାଇଲେ । ଏଥିରେ ପରିବାର ଚଳାଇବା କଷ୍ଟ ହେବାରୁ ୨୦୧୪ ମସିହାରୁ ଆମ୍ବାଗନ ଇସ୍ପାତ ଗଜପତି ମାର୍କେଟରେ ଏକ ଦୋକାନ କରି ପକୁଡ଼ି ଓ ମାଲପୁଆ ଛାଣି ବିକ୍ରି କରୁଥିବା କହନ୍ତି ସୁରେନ୍ଦ୍ର । ଅନ୍ୟ ରାଜ୍ୟରେ କ୍ରୀଡ଼ାବିତ୍ଙ୍କୁ ଯେତିକି ପ୍ରୋତ୍ସାହନ ମିଳୁଛି ଆମ ରାଜ୍ୟରେ ସେ ତୁଳନାରେ କିଛି ମିଳୁନାହିଁ ବୋଲି ସେ କ୍ଷୋଭର ସହ ପ୍ରକାଶ କରନ୍ତି।
