ଏପ୍ରିଲ ପ୍ରଥମ ସପ୍ତାହରେ ଆରମ୍ଭ ହେବ +୨ ଖାତା ମୂଲ୍ୟାୟନ

ଭୁବନେଶ୍ୱର : ଏପ୍ରିଲ ପ୍ରଥମ ସପ୍ତାହରୁ ଯୁକ୍ତ-୨ ପରୀକ୍ଷା ଖାତା ମୂଲ୍ୟାୟନ କରାଯିବ। କଳା, ବିଜ୍ଞାନ, ବାଣିଜ୍ୟ ଓ ଧନ୍ଦାମୂଳକ ଶିକ୍ଷା ମାର୍ଚ୍ଚ ୩୦ ତାରିଖରେ ପରୀକ୍ଷା ସରିବା ପରେ ସମସ୍ତ ଖାତାର ମୂଲ୍ୟାୟନ ଆରମ୍ଭ ହେବ। ଏ ନେଇ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି। ବିଗତ ବର୍ଷ ପରି ଏଥରକ ମଧ୍ୟ ଉଭୟ ଅନଲାଇନ ଓ ଅଫଲାଇନ ଉତ୍ତର ଖାତା ମୂଲ୍ୟାୟନ କରାଯିବ।
ଏପ୍ରିଲ ମାସରେ ସମଗ୍ର ରାଜ୍ୟରେ ବିଭିନ୍ନ ପ୍ରର୍ଯ୍ୟାୟରେ ନିର୍ବାଚନ ହେବାକୁ ଥିବାରୁ ତାହାର ପ୍ରଭାବ ଯୁକ୍ତ-୨ ଖାତା ମୂଲ୍ୟାୟନ ଉପରେ ପଡିବାର ଆଶଙ୍କା ଦେଖାଦେଇଛି। ଅଧ୍ୟାପକ ମାନେ ନିର୍ବାଚନରେ ଭାଗ ନେଇଥିବାରୁ ଖାତା ମୂଲ୍ୟାୟନରେ ବାଧା ଉପୁଜିପାରେ। ତାକୁ ଦୃଷ୍ଟିରେ ରଖି ପରିଷଦ ପକ୍ଷରୁ ମୂଲ୍ୟାୟନରେ କିଛି ପରିବର୍ତ୍ତନ କରିବାକୁ ଯୋଜନା ରହିଛି। ଯେଉଁ ଅଞ୍ଚଳରେ ଭୋଟଗ୍ରହଣ କରାଯିବ, ସେଠାରେ ପ୍ରାୟ ୪ଦିନ ପାଇଁ ଖାତା ଦେଖା ବନ୍ଦ ରଖିବାକୁ ପରିଷଦ ଯୋଜନା କରିଛି। କିନ୍ତୁ ବର୍ତ୍ତମାନ ସୁଦ୍ଧା ଚୂଡାନ୍ତ ନିଷ୍ପତ୍ତି ନିଆଯାଇନାହିଁ।
ଅନ୍ୟପକ୍ଷରେ ବିଜ୍ଞାନ ଓ ବାଣିଜ୍ୟ ବିଭାଗର ପ୍ରମୁଖ ବିଷୟ ପରୀକ୍ଷା ଶେଷ ହେଇଥିବାରୁ ଇ-ମୂଲ୍ୟାୟନ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି। ଚଳିତ ସପ୍ତାହରେ ହିଁ ଉତ୍ତର ଖାତା ଗୁଡିକ ସ୍କାନିଂ କରାଯିବ। ପରିଷଦ ମେ ମାସ ଶେଷ କିମ୍ବା ଜୁନ ପ୍ରଥମ ସପ୍ତାହ ସୁଦ୍ଧା ପରୀକ୍ଷା ଫଳ ପ୍ରକାଶ କରିବାକୁ ଲକ୍ଷ୍ୟ ରଖିଛି।