ପିପିଲି : ଅନୁସୂଚିତ ଜାତି ଓ ଜନ ଜାତି ସ୍ଥାନ ସଂରକ୍ଷଣ ସଂକ୍ରାନ୍ତରେ ଦେଶର ସର୍ବୋଚ୍ଚ ନ୍ୟାୟାଳୟ ପ୍ରଦାନ କରିଥିବା ରାୟର ପ୍ରତିବାଦରେ ତଥା ଉପବର୍ଗୀକରଣ ଓ ସ୍ୱଚ୍ଛଳ ବର୍ଗ ନୀତି ଲାଗୁ କରାନଯିବା ଦାବିରେ ଦିଆଯାଇଥିବା ଭାରତ ବନ୍ଦର ପ୍ରଭାବ ବୁଧବାର ପିପିଲି ଅଞ୍ଚଳରେ ଦେଖିବାକୁ ମିଳିଥିଲା। ଜାତୀୟ ଦଳିତ, ଆଦିବାସୀ, ମାଇନୋରିଟି ମହାସଂଘର ରାଜ୍ୟ ସଭାପତି ବିଜୟ କୁମାର ସେଠୀ, ରାଜ୍ୟ ସଂପାଦିକା ସୋନିଲତା ସେଠୀ, ନାରୀନେତ୍ରୀ ପାର୍ବତୀ ମଲ୍ଲିକ, ଲାବଣ୍ୟ ମଲ୍ଲିକ, ମିନତୀ ମଲ୍ଲିକ ଏବଂ ଅଖିଳ ଭାରତ କୃଷକ ମହାସଭାର ନେତା ଅଶୋକ ପ୍ରଧାନ, କିଷାନ ପଟ୍ଟନାୟକ, ଗଙ୍ଗାଧର ସେଠୀ, ସର୍ବେଶ୍ୱର ଭାରତୀ, କାହ୍ନୁଚରଣ ବେହେରା, ରାମଚନ୍ଦ୍ର ମହାରଣା, ତ୍ରିଲୋଚନ ବେହେରା, ବର୍ଷାରାଣୀ ଦାସ ପ୍ରମୁଖଙ୍କ ନେତୃତ୍ୱରେ ଶତାଧିକ ଆନ୍ଦୋଳନକାରୀ ବୁଧବାର ସକାଳ ସାଢେ ୮ଟାରୁ ୧ଘଣ୍ଟା ପର୍ଯ୍ୟନ୍ତ ଭୁବନେଶ୍ୱର-ପୁରୀ ଜାତୀୟ ରାଜପଥକୁ ପିପିଲି ଟୋଲପ୍ଲାଜା ଛକ ଠାରେ ଟାୟାର ଜାଳି ଅବରୋଧ କରିଥିଲେ।
ଫଳରେ ସେହିବାଟ ଦେଇ ଗାଡିମୋଟର ଚଳାଚଳ ପ୍ରଭାବିତ ହୋଇଥିଲା। ସେଠାରେ ସେମାନେ କେନ୍ଦ୍ର ସରକାର ବିରୋଧି ବିଭିନ୍ନ ସ୍ଲୋଗାନ ଦେଇଥିବା ବେଳେ ପ୍ରଧାନମନ୍ତ୍ରୀ ଓ କେତେକ କେନ୍ଦ୍ରମନ୍ତ୍ରୀଙ୍କ ବ୍ୟାନରକୁ ପୋଡି ପ୍ରତିବାଦ କରିଥିଲେ । ପରେ ଏକ ଶୋଭାଯାତ୍ରାରେ ପିପିଲି ବଜାର ପରିକ୍ରମା କରିବା ସହ ବିଭିନ୍ନ ରାଷ୍ଟ୍ରାୟତ ବ୍ୟାଙ୍କକୁ ବନ୍ଦ କରିଥିଲେ। ପିପିଲି ତହସିଲ ଓ ବ୍ଲକ କାର୍ଯ୍ୟାଳୟର ମୁଖ୍ୟ ଫାଟକକୁ ସେମାନେ ଦୀର୍ଘ ଦେଢ ଘଣ୍ଟା ପର୍ଯ୍ୟନ୍ତ ଅବରୋଧ କରି ବିକ୍ଷୋଭ ପ୍ରଦର୍ଶନ କରିବା ସହ ପ୍ରତିବାଦ କରିଥିଲେ। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ପିପିଲି ପୁଲିସ ଘଟଣାସ୍ଥଳରେ ମୁତୟନ ଥିଲା।
ପିପିଲିରେ ଭାରତ ବନ୍ଦର ପ୍ରଭାବ
Popular Categories
Previous article
Next article