ପିପିଲି : ଭୁବନେଶ୍ୱର-
ମସ୍ତିଷ୍କ ଖାଉଥିବା ଏମିବା ; ଜାଣନ୍ତୁ କ’ଣ ଏହି ରୋଗ, କେମିତି ହୁଏ, ମାତ୍ର ଏତିକି ଦିନରେ ହୁଏ ମୃତ୍ୟୁ..
ସୂଚନା ଅନୁଯାଇ, ଭୁବନେଶ୍ୱରର ଏକ ଘରୋଇ ଠିକା ସଂସ୍ଥା ପକ୍ଷରୁ ଭୁବନେଶ୍ୱର-ପୁରୀ ଜାତୀୟ ରାଜପଥର ପିପିଲି ବାଇପାସ ରାସ୍ତାର ଡିଭାଇଡର ମଝିରେ ଆଜି ଷ୍ଟ୍ରିଟ୍ ଲାଇଟ୍ ଖୁଣ୍ଟି ପୋତା ଯାଉଥିଲା । ମଧ୍ୟାହ୍ନ ଗୋଟାଏ ସମୟରେ ବାଇପାସ ରାସ୍ତାର ତରାକାଜ ନିକଟରେ ଏକ ହାଇଡ୍ରା ମେସିନ୍ ଦ୍ୱାରା ଷ୍ଟ୍ରିଟ୍ ଲାଇଟ୍ ଖୁଣ୍ଟିକୁ ଉପରକୁ ଉଠାଯାଉଥିବା ବେଳେ ସେଠାରେ ରାସ୍ତା ଉପରେ ଥିବା ୩୩ କେଭି ବିଦ୍ୟୁତ୍ ତାରରେ ଉକ୍ତ ଖୁଣ୍ଟି ଲାଗି ଯାଇଥିଲା । ଫଳରେ ଖୁଣ୍ଟିକୁ ଧରିଥିବା ଶ୍ରମିକ ଜଣକ ବିଦ୍ୟୁତ୍ ଆଘାତରେ ଗୁରୁତର ହୋଇପଡିଥିଲେ। ତାଙ୍କ ଦୁଇ ହାତ ସମେତ ଶରୀରର ବାମପାଶ୍ୱର୍ ତଥା ଛାତି, ଜଙ୍ଘ, ଗୋଡ ଆଦି ଜଳି ଯାଇଥିବା ପରିଲକ୍ଷିତ ହୋଇଛି। ତାଙ୍କୁ ପିପିଲି ଓ ପରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ଅବସ୍ଥା ସଂକଟାପନ୍ନ ଥିବା ଡାକ୍ତରଖାନା ସୂତ୍ରରୁ ଜଣାଯାଇଛି । ଉକ୍ତ ଠିକା ସଂସ୍ଥା ପକ୍ଷରୁ ଟିପିସିଓଡିଏଲ୍ ଠାରୁ କୌଣସି ଅନୁମତି ନିଆଯାଇନଥିବା ବେଳେ ଆଜି ଷ୍ଟ୍ରିଟ୍ ଲାଇଟ୍ ଖୁଣ୍ଟି ପୋତିବା ବେଳେ ବିଦ୍ୟୁତ୍ ବିଭାଗକୁ ଅବଗତ ମଧ୍ୟ କରାଯାଇନଥିବା ଜଣାଯାଇଛି । ବିଦ୍ୟୁତ୍ ଦୁର୍ଘଟଣା ଘଟିବା ପରେ ସମଗ୍ର ପିପିଲି ଅଞ୍ଚଳରେ ବିଦ୍ୟୁତ୍ ସରବରାହ ବନ୍ଦ ହୋଇରହିଥିଲା । ଘଟଣା ସ୍ଥଳରେ ପିପିଲି ବିଦ୍ୟୁତ୍ ବିଭାଗର ଉପଖଣ୍ଡ ଅଧିକାରୀ ବିପିନ କୁମାର ସାହୁଙ୍କ ସମେତ ଟିପିସିଓଡିଏଲ୍ ଅଧିକାରୀମାନେ ପହଞ୍ଚି ଥିଲେ । ୩୩ କେଭି ଲାଇନ୍ରେ ଲାଗି ରହିଥିବା ଷ୍ଟ୍ରିଟ୍ ଲାଇଟ୍ ଖୁଣ୍ଟିକୁ କାଢିବା ପରେ ମଧ୍ୟାହ୍ନ ୨ଟା ୫୦ମିନିଟ୍ ରେ ପିପିଲିକୁ ବିଦ୍ୟୁତ୍ ସରବରାହ ସ୍ୱାଭାବିକ ହୋଇଥିଲା । ଏହି ଘଟଣାକୁ ନେଇ ଉକ୍ତ ଠିକା ସଂସ୍ଥା ବିରୋଧରେ ପୁଲିସରେ ଲିଖିତ ଅଭିଯୋଗ କରାଯିବ ବୋଲି ପିପିଲି ବିଦ୍ୟୁତ୍ ବିଭାଗର ଉପଖଣ୍ଡ ଅଧିକାରୀ ଶ୍ରସାହୁ ସୂଚନା ଦେଇଛନ୍ତି ।
