ପିପିଲି: ଭୁବନେଶ୍ୱର-ପୁରୀ ଜାତୀୟ ରାଜପଥର ସିଉଳା ନିକଟରେ ଏକ ମାଲ ବୋଝେଇ ଡାଲା ଅଟୋ ଭାରଶ୍ୟାମ ହରାଇ ଦୁର୍ଘଟଣା ଗ୍ରସ୍ତ ହେବା ଫଳରେ ଅଟୋରେ ଥିବା ଦୁଇ ଜଣ ଗୁରୁତର ଭାବେ ଆହତ ହୋଇଛନ୍ତି।
ପିପିଲି ମୁଖ୍ୟ ବଜାରରେ ଥିବା ଏକ ହୋଲ ସେଲିଙ୍ଗ ଦୋକାନର ମାଲିକଙ୍କ ଭଣଜା ଆଜି ଏକ ଡାଲା ଅଟୋରେ ଭୁବନେଶ୍ୱରରୁ ଥଣ୍ଡା ପାନୀୟ ସାମଗ୍ରୀ ନେଇ ପିପିଲି ଆସୁଥିବା ବେଳେ ଅଟୋଟି ସିଉଳା ନିକଟରେ ଦୁର୍ଘଟଣାର ଶିକାର ହୋଇଥିଲା। କୌଣସି କାରଣରୁ ଅଟୋଟି ଭାରସାମ୍ୟ ହରାଇ ରାସ୍ତାରେ ଥିବା ଏକ ଜେସିବି ପଛରେ ପିଟି ହୋଇ ଯାଇଥିଲା।
ଫଳରେ ଅଟୋରେ ଥିବା ରବୀନ୍ଦ୍ର କୁମାର ଅଗ୍ରୱାଲ ଓରଫ ବୁଲୁ (୩୭) ଓ ଚାଳକ ରିତେଶ କୁମାର ସ୍ୱାଇଁ ଓରଫ ଚିଣ୍ଟୁ (୨୨) ଗୁରୁତର ଭାବେ ଆହତ ହୋଇଥିଲେ। ଅଟୋ ମଧ୍ୟରେ ଚାଳକ ଚିଣ୍ଟୁ ଚାପି ହୋଇ ରହିଥିବା ବେଳେ ପିପିଲି ଅଗ୍ନିଶମ ବାହିନୀ, ପିପିଲି ପୋଲିସ ଓ ରାଜପଥ ପୁଲିସ ପେଟ୍ରୋଲିଙ୍ଗ ଟିମ ସେଠାରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କରିଥିଲେ। ଆମ୍ବୁଲାନ୍ସ ଯୋଗେ ଉଭୟ ଆହତଙ୍କୁ ଚିକିତ୍ସା ଲାଗି AIIMSରେ ଭର୍ତ୍ତି କରାଯାଇଥିବା ସୂଚନା ମିଳିଛି।
ଦୁର୍ଘଟଣା ଗ୍ରସ୍ତ ଗାଡିକୁ ପିପିଲି ପୁଲିସ ଜବତ କରି ଘଟଣାର ତଦନ୍ତ ଜାରି ରଖିଥିବା ସୂଚନା ମିଳିଛି। ଦୁର୍ଘଟଣା ଯୋଗୁଁ କିଛି ସମୟ ପାଇଁ ଘଟଣା ସ୍ଥଳରେ ଗୁରୁତର ଟ୍ରାଫିକ ସମସ୍ୟା ଉପୁଜିଥିଲା। ଉଭୟ ଆହତଙ୍କ ଘର ପିପିଲି ଅଂଚଳରେ ହୋଇଥିବା ସୂଚନା ମିଳିଛି।
Comments are closed.