ପିପିଲି:ନ୍ୟାୟ ପାଇବା ପାଇଁ ଦୀର୍ଘ ୫ବର୍ଷ ଧରି ରାଜଧାନୀର ଗାନ୍ଧିମାର୍ଗରେ ଧାରଣା ଦେଇଥିବା ପିପିଲିର ସୁରଥ ଧଳଙ୍କ ପରିବାର ମଙ୍ଗଳବାର ଦିନ ପିପିଲି ତହସିଲଦାରଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ନିଜ ପୈତୃକ ସଂପତ୍ତିକୁ ପାଇବା ଓ ପତ୍ନୀଙ୍କ ନାମରେ ଥିବା ଜମିରୁ ଜବରଦଖଲ ଉଚ୍ଛେଦ କରାଯିବା ଦାବିରେ କଣ୍ଟି ପଞ୍ଚାୟତ ଅନ୍ତର୍ଗତ ନିଜିଗଡକୁରୁଖି ଧଳସାହିର ବାସିନ୍ଦା ସୁରଥ ଧଳଙ୍କ ସମେତ ତାଙ୍କ ପତ୍ନୀ ସୁବାସିନୀ ଧଳ ନିଜର ତିନିପୁଅ ନାରାୟଣ ଧଳ, ଜନାର୍ଦ୍ଦନ ଧଳ, ମାନଗୋବିନ୍ଦ ଧଳ, ବୋହୁ ଲକ୍ଷ୍ମୀ ଧଳ ଓ ନାତିନାତୁଣୀଙ୍କୁ ସାଙ୍ଗରେ ଧରି ଧାରଣାରେ ବସିଥିବା ସୂଚନା ମିଳିଛି।
ମାନଗୋବିନ୍ଦଙ୍କ ଅଭିଯୋଗ ଅନୁଯାଇ, ତାଙ୍କ ବାପା ସୁରଥ ଧଳଙ୍କର ପୈତୃକ ସଂପତ୍ତି ବାବଦରେ ଥିବା ୬.୨୫ ଏକର ଜମିର ଭୋଗଦଖଲରୁ ସେମାନେ ବଞ୍ôଚତ ହୋଇଥିବା ବେଳେ ଉକ୍ତ ଜମିକୁ ଅନ୍ୟମାନେ ଦଖଲ କରିଛନ୍ତି। ସେହିପରି ତାଙ୍କ ମାଆ ସୁବାସିନୀ ଧଳଙ୍କ ନାମରେ ଥିବା ୧.୭୧ ଏକର ଜମିର ୭ଡିସିମିଲ ଅଞ୍ଚଳକୁ ଜବରଦଖଲ କରାଯାଇ ସେଠାରେ ୧୨ବଖରା ଘର ନିର୍ମାଣ କରାଯାଇଛି। ଏହାର ପ୍ରତିବାଦ କରିବାକୁ ତାଙ୍କ ପରିବାରକୁ ବିଭିନ୍ନ ସମୟରେ ଧମକ ଦିଆଯିବା ଦ୍ୱାରା ସେମାନେ ଜୀବନ ଭୟରେ ନିଜ ଭିଟାମାଟି ଛାଡି ବାହାରେ ରହୁଛନ୍ତି।
ଏଥିପାଇଁ ଭୟଭିତ ହୋଇ ତାଙ୍କ ଝିଆରି ଦ୍ୱୟ ମଧ୍ୟ ସ୍କୁଲକୁ ନଯାଇ ପାଠ ପଢିବାରୁ ବଞ୍ଚିତ ହୋଇଛନ୍ତି। ନ୍ୟାୟ ପାଇବା ପାଇଁ ଗତ ୨୦୧୭ ମସିହା ଜାନୁଆରୀ ୨୭ ତାରିଖରୁ ସେମାନେ ଭୁବନେଶ୍ୱରର ଗାନ୍ଧିମାର୍ଗରେ ପରିବାର ସହ ଧାରଣା ଦେଇ ଆସୁଥିବା ବେଳେ ଆଜି ଠାରୁ ପିପିଲି ତହସିଲଦାରଙ୍କ କାର୍ଯ୍ୟାଳୟ ସମ୍ମୁଖରେ ପରିବାର ସହ ଧାରଣା ଦେଇଥିବା ମାନଗୋବିନ୍ଦ କହିଛନ୍ତି। ନ୍ୟାୟ ନମିଳିବା ଯାଏଁ ସେମାନେ ଧାରଣାରୁ ଉଠିବେ ନାହିଁ ବୋଲି ସେ ଚେତାବନୀ ଦେଇଛନ୍ତି। ସୁରଥଙ୍କ ପୈତୃକ ସଂପତ୍ତି ବାବଦ ୬.୨୫ ଏକର ଜମିକୁ ଫେରିପାଇବା, ସୁବାସିନୀ ଧଳଙ୍କ ନାମରେ ଥିବା ୧.୭୧ ଏକର ଜମିରୁ ଜବରଦଖଲ ଉଚ୍ଛେଦ କରାଯିବା ଓ ତାଙ୍କ ପରିବାରକୁ ଆବଶ୍ୟକ ସୁରକ୍ଷା ପ୍ରଦାନ କରାଯିବା ଦାବିରେ ଏହି ଧଳ ପରିବାର ଧାରଣାରେ ବସିଛନ୍ତି। ଏ ବାବଦରେ ପୂର୍ବରୁ ସେମାନେ ବିଭାଗୀୟ ଉଚ୍ଚ ପଦସ୍ଥ ଅଧିକାରୀଙ୍କ ଠାରୁ ଆରମ୍ଭ କରି ବିଭିନ୍ନ ମହଲରେ ଦାବି କରି ନିରାଶ ହୋଇଥିବା ମାନଗୋବିନ୍ଦ ସୂଚନା ଦେଇଛନ୍ତି।
