ଫୁଲବାଣୀ: କନ୍ଧମାଳ ଜିଲାର ଖଜୁରୀପଡ଼ା ବ୍ଲକ୍ ଅନ୍ତର୍ଗତ ସୁଡ୍ରେଜୁ ଗ୍ରାମର ନମିତା କହଁରଙ୍କର ଭୋଟର କାର୍ଡରେ ତ୍ରୁଟି ଯୋଗୁଁ ସରକାରୀ ଯୋଜନାରୁ ବଞ୍ଚିତ ହୋଇଛନ୍ତି । ସୂଚନା ପ୍ରକାରେ ସୁଡ୍ରେଜୁ ଗ୍ରାମର ନମିତା କହଁର ତାଙ୍କର ସ୍ୱାମୀ ସ୍ବର୍ଗତ ବସନ୍ତ କହଁର ଗତ ବର୍ଷ ମାର୍ଚ୍ଚ ମାସରେ ମୃତ୍ୟୁ ବରଣ କରିଥିଲେ।
ଦୀର୍ଘ ଏକ ବର୍ଷ ହେବ ଭୋଟର କାର୍ଡରେ ତ୍ରୁଟି ଯୋଗୁଁ ବିଧବା ଭତ୍ତା ଓ ପରିବାର କଲ୍ୟାଣ ଯୋଜନା ପରି ସରକାରୀ ଯୋଜନା ପାଇବାରୁ ବଞ୍ଚିତ ହୋଇଛନ୍ତି । ତାଙ୍କର ଗୋଟିଏ ପୁଅ ତିନି ବର୍ଷ ହୋଇଥିବା ବେଳେ ଝିଅକୁ ମାତ୍ର ବର୍ଷେ ହେବ। ଝିଅଟି ଗର୍ଭରେ ଥିବା ସମୟରେ ହିଁ ତା’ବାପା ଚାଲିଯାଇଛି । ଯାହାଫଳରେ ଦୁଇ ଦୁଇଟା କୋମଳମତି ଛୁଆମାନଙ୍କୁ ଧରି ନମିତା ଚଳିବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।
ଭତ୍ତା ପାଇଁ ଖଜୁରୀପଡା ବ୍ଲକକୁ ବାରମ୍ବାର ଯାଇଥିଲେ ମଧ୍ୟ କିଛି ସୁଫଳ ମିଳିପାରିନାହିଁ । ନିକଟରେ ଭୋଟର କାର୍ଡ ସଂଶୋଧନ ପାଇଁ ଦେଇଥିଲେ ମଧ୍ୟ ତାହା ମିଳିନଥିବା କହିଛନ୍ତି । ତେଣୁ ପ୍ରଶାସନ ଏହି ବେସାହାରା ପରିବାରକୁ ଦୃଷ୍ଟି ଦେଇ ତୁରନ୍ତ ପଦକ୍ଷେପ ନେଇ ଯେକୌଣସି ପ୍ରକାରେ ସରକାରୀ ସହାୟତା ପ୍ରଦାନ କରିବାକୁ ସାଧାରଣରେ ଦାବି ହୋଇଛି।
