ପାତ୍ରପୁର: ଆନ୍ଧ୍ର ପ୍ରଦେଶର ଏକ ଗ୍ରାମରୁ ମଙ୍ଗଳବାର ଏକ ଅଟୋ ଯୋଗେ ବସ୍ତାରେ ମାଙ୍କଡ଼ ଭର୍ତ୍ତିକରି ନେଉଥିବା ଅଭିଯୋଗରେ ଅଟକ ଦୁଇ ଯୁବକଙ୍କୁ ଜଙ୍ଗଲ ବିଭାଗ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତ ଦୁଇଜଣ ହେଲେ ଆନ୍ଧ୍ର ଏଳୁରୁ ମଣ୍ଡଳ ଚଞ୍ଚଳ କଲୋନୀର ରମେଶ ସିଂ(୨୦) ଏବଂ ଶ୍ରୀକାକୁଲମ ଜିଲ୍ଲା ମୁନିଷୀପାଲ କାର୍ଯ୍ୟାଳୟ ନିକଟର ପୁସଲା ନାଗରାଜୁ(୨୩)।
ଗତକାଲି ରାତିରେ ଏହି ଦୁଇଜଣ ଏକ ଅଟୋ ଯୋଗେ ଅମାନୁଷିକ ଭାବେ ବସ୍ତାରେ ମାଙ୍କଡ଼ ବୋଝେଇ କରି ତୁମ୍ବା ଆଡକୁ ଯାଉଥିବା ବେଳେ ଜରଡ଼ା ଛକରେ ମାଙ୍କଡ଼ମାନଙ୍କ ରଡ଼ି ଶୁଣି ସ୍ଥାନୀୟ ଲୋକେ ସନ୍ଦେହରେ ଗାଡ଼ିକୁ ଅଟକାଇଥିଲେ। ଏହି ସମୟରେ ମାଙ୍କଡ଼ମାନଙ୍କୁ ଆଠଟି ବସ୍ତାରେ ମୁହଁ ବାନ୍ଧି ରଖା ଯାଇଥିବା ଜାଣିବାକୁ ପାଇ ପୁଲିସକୁ ଖବର ଦେଇଥିଲେ। ଏହାପରେ ବନବିଭାଗକୁ ଖବର ଦେବା ପରେ ବନବିଭାଗ କର୍ମଚାରୀମାନେ ପହଞ୍ଚି ଅଟୋଟିକୁ ସାମନ୍ତିଆ ପଲ୍ଲୀ କାର୍ଯ୍ୟାଳୟକୁ ନେଇଥିଲେ। ଆଠଟି ବସ୍ତାରେ ବାର ଗୋଟି ମାଙ୍କଡ଼ ଥିବା ବେଳେ ଦଶଟି ମାଙ୍କଡଙ୍କ ମୃତ୍ୟୁ ହୋଇଥିଲା। ଏହି ମାମଲାରେ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଥିବା ରେଞ୍ଜର ମନୋଜ କୁମାର ପାତ୍ର କହିଛନ୍ତି। ମୃତ ମାଙ୍କଡ଼ମାନଙ୍କ ଶବବ୍ୟବଚ୍ଛେଦ ପରେ ଗାତଖୋଳି ପୋତି ଦିଆଯାଇଛି। ଏହି ଘଟଣାରେ ଅଟୋ ସହିତ ମାଙ୍କଡ଼ ଧରିବା ପାଇଁ ବ୍ୟବହାର କରୁଥିବା ଜାଲ ଜବତ କରାଯାଇଛି। ଆନ୍ଧ୍ର ଭୈରପୁର ଗ୍ରାମରୁ ଏହି ମାଙ୍କଡ଼ ଧରି ତୁମ୍ବା ଜଙ୍ଗଲରେ ଛାଡ଼ିବା ପାଇଁ ନେଉଥିବା ଅଭିଯୁକ୍ତମାନେ ପ୍ରକାଶ କରିଛନ୍ତି। ଏପରିକି ସେହି ଅଂଚଳର କିଛି ଲୋକଙ୍କ ପାଖରୁ ଆର୍ଥିକ ସହାୟତା ପାଇ ବିଭିନ୍ନ ସମୟରେ ମାଙ୍କଡ଼ ଧରି ଓଡ଼ିଶାର ଜଙ୍ଗଲରେ ଛାଡୁଥିବା ଅଭିଯୁକ୍ତମାନେ ପ୍ରକାଶ କରିଛନ୍ତି ।
