ପାଟଣା: କେନ୍ଦୁଝର ଜିଲା ତୁରୁମୁଙ୍ଗା ଥାନା ଚେମଣା ପଞ୍ଚାୟତ ବଳିଆପଶି ଗ୍ରାମ ନିକଟ ବୁଲାଣୀ ରାସ୍ତା ପାର୍ଶ୍ବରୁ ଆଜି ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ ଯୁବକ ବରୁଡିପଶି ଗ୍ରାମର କୁଳମଣି ନାଏକ(୨୫) ବୋଲି ଜଣାପଡିଛି । ସୂଚନା ଅନୁଯାୟୀ ଆଜି ସକାଳୁ ବଳିଆପଶି ଗ୍ରାମ ରାସ୍ତା କଡ଼ରେ ବାଇକ୍ ସହ ଜଣେ ଯୁବକର ମୃତ ଦେହ ପଡ଼ିଥିବା ଦେଖି ସ୍ଥାନୀୟ ଲୋକେ ତୁରୁମୁଙ୍ଗା ପୁଲିସକୁ ଖବର ଦେଇଥିଲେ । ଘଟଣା ସ୍ଥଳରେ ପୁଲିସ ପହଞ୍ଚି ମୃତଦେହ ଜବତ ସହ ତଦନ୍ତ ଆରମ୍ଭ କରିଛି। ଯୁବକ ଜଣଙ୍କର ବାଇକ୍ ଦୁର୍ଘଟଣାରେ ମୃତ୍ୟୁ ଘଟିଛି ନା ତାହାର ଅନ୍ୟ କିଛି କାରଣ ରହିଛି ତାହା ସ୍ପଷ୍ଟ ହୋଇନାହିଁ। ରାତିରେ ସ୍ଥାନୀୟ ଲୋକେ କିଛି ଶବ୍ଦ ଶୁଣିବା ପରେ ସେହି ସ୍ଥାନକୁ ଆସିଥିଲେ ମଧ୍ୟ ଅନ୍ଧାର ଯୋଗୁଁ କିଛି ଜାଣିପାରିନଥିଲେ। ଆଜି ସକାଳୁ ଏହି ରାସ୍ତା ପାର୍ଶ୍ବରୁ କିଛି ଦୂରରେ ମୃତ ଯୁବକ ଓ ବାଇକଟି ପଡ଼ି ରହିଥିବା ଦେଖି ଲୋକେ ପୁଲିସକୁ ସୂଚନା ଦେଇଥିଲେ। ମୃତକଙ୍କ ମୃତଦେହ ଉଦ୍ଧାର କରାଯାଇ କେନ୍ଦୁଝର ରେ ଶବ ବ୍ୟବଚ୍ଛେଦ କରାଯାଇଛି। ଏନେଇ ଥାନା ରେ ଏକ ଦୁର୍ଘଟଣା ମାମଲା ରୁଜ୍ଜୁ ହୋଇଛି।
Comments are closed.