ପଦ୍ମପୁର : ପଦ୍ମପୁର ଥାନା ଅନ୍ତର୍ଗତ ପାଜିଲି ବନ୍ଧ ନାଳ ନିକଟରେ ଗୁଣି ଗାରେଡ଼ି ସନ୍ଦେହରେ ଗତ ୨୦୨୧ ଜାନୁଆରୀ ୨୬ ତାରିଖରେ ପାଜିଲିବନ୍ଦ ଗ୍ରାମର ରାମ ମୁଳିକୁ ପୋଡ଼ି ହତ୍ୟା କରି ଫେରାର ଥିବା ଆସାମୀ ଗିରଫ ହୋଇଛି। ଅଭିଯୁକ୍ତ ରାମ ଶବରକୁ ଗୁରୁବାର ପଦ୍ମପୁର ପୁଲିସ ଗିରଫ କରି କୋର୍ଟ ଚାଲାଣ କରିଛି।
ପୁଲିସ ସୂଚନା ଅନୁଯାୟୀ, ପଦ୍ମପୁର ବ୍ଲକ ନୂଆଗଡ଼ ପଞ୍ଚାୟତ ଅନ୍ତର୍ଗତ ପାଜିଲି ବନ୍ଧ ନାଳ ନିକଟରେ ଗୁଣି ଗାରେଡ଼ି ସନ୍ଦେହରେ ସେହି ଗ୍ରାମର ୫୮ ବର୍ଷୀୟ ରାମ ମୂଳି ନାମକ ବ୍ୟକ୍ତିଙ୍କୁ ହତ୍ୟା କରାଯାଇଥିଲା। ପରେ ପ୍ରମାଣ ନଷ୍ଟ କରିବା ପାଇଁ ଦୁର୍ବୃତ୍ତମାନେ ମୃତଦେହ ପୋଡି ଫେରାର ହୋଇଯାଇଥିଲେ। ଘଟଣା ଦିନ ପଦ୍ମପୁର ଥାନାରେ ରାମ ମୂଳିଙ୍କ ପତ୍ନୀ ମାୟା ମୂଳି ଅଭିଯୋଗ କରିଥିଲେ। ମୃତକଙ୍କ ପତ୍ନୀ ଏବଂ ପରିବାର ଲୋକଙ୍କୁ ପୁଲିସ ପଚରା ଉଚରା କରି ଘଟଣା ସ୍ଥଳକୁ ଯାଇ ତଦନ୍ତ ଆରମ୍ଭ କରି କିଛି ଅଭିଯୁକ୍ତଙ୍କୁ ଗିରଫ କରିଥିବା ବେଳେ ଅନ୍ୟ ଜଣେ ଅଭିଯୁକ୍ତ ରାମ ଶବର ଫେରାର ଥିଲା। ପଦ୍ମପୁର ଏଏସଆଇ ପ୍ରଜ୍ଞା ନାୟକ ଓ ଟିମ ଅଭିଯୁକ୍ତ ଘରକୁ ଯାଇ ଗିରଫ କରି ଗୁଣୁପୁର କୋର୍ଟ ଚାଲାଣ କରିଥିବା ସୂଚନା ମିଳିଛି।
