ଗାଡିର ଗୋଟିଏ ନମ୍ବର ପ୍ଲେଟ୍ର ମୂଲ୍ୟ କେତେ ହୋଇପାରେ ବୋଲି ଭାବୁଛନ୍ତି! ଅବଶ୍ୟ ସୁନା, ହୀରା ଲାଗିଥିଲେ ଦାମିକା ହୋଇଥାଏ। ଏହି ନମ୍ବର ପ୍ଲେଟ୍ରେ ସୁନା କି ହୀରା ଲାଗିନାହିଁ, କିନ୍ତୁ ଏହାକୁ କିଣିବାକୁ ହେଲେ ୧୩୨କୋଟି ଟଙ୍କା ଦେବାକୁ ହେବ। ‘ଏଫ୍୧’ ଲେଖାଥିବା ଏହି କାର୍ ନମ୍ବର ପ୍ଲେଟ୍ ବିକ୍ରି ପାଇଁ ଅନ୍ଲାଇନରେ ଉପଲବ୍ଧ ହୋଇଛି। ବ୍ରିଟେନ ବାସିନ୍ଦା ଅଫଜଲ ଖାନ୍ ନିଜ ‘ଏଫ୍୧’ ଭ୍ୟାନିଟି ନମ୍ବର ପ୍ଲେଟ୍ ପାଇଁ ଅନ୍ଲାଇନ୍ରେ ବିଜ୍ଞାପନ ଦେଇଛନ୍ତି। ଏହି ନମ୍ବର ପ୍ଲେଟ୍ଟି ଏବେ ତାଙ୍କ ବୁଗାତି ବିରୋନ୍ କାର୍ରେ ଲାଗିଛି।
ୟୁରୋ ଷ୍ଟାଇଲ୍ରେ ଲିଖିତ ଏହି ନମ୍ବର ପ୍ଲେଟ୍ର ‘ଏଫ୍୧’ ଅର୍ଥ ଫର୍ମୁଲା ୱାନ୍। କାରସ୍କୁପ୍ସ ତଥ୍ୟ ଅନୁସାରେ, ଅଫଜଲ ଚଳିତ ବର୍ଷ ୧୦.୫୨କୋଟି ଟଙ୍କାରେ ଏହି ନମ୍ବର ପ୍ଲେଟ୍ କିଣିଥିଲେ। ତେବେ ସେ ଏତେ ଦାମୀ ନମ୍ବର ପ୍ଲେଟ୍ କାହିଁକି କିଣିଲେ ଜଣାପଡିନାହିଁ। ହୁଏତ ସେ ଫର୍ମୁଲା ୱାନ୍ ରେସିଂର ପ୍ରଶଂସକ ହୋଇପାରନ୍ତି କିମ୍ବା ନିବେଶ ଉଦ୍ଦେଶ୍ୟରେ କିଣିଥାଇପାରନ୍ତି ବୋଲି ଅନୁମାନ କରାଯାଉଛି। ବ୍ରିଟେନର ନାଗରିକମାନେ ନିଜ ଲାଇସେନ୍ସ ପ୍ଲେଟ୍ର ମାଲିକ ହୋଇଥିବାରୁ ଏହାର ବିକ୍ରି କିମ୍ବା ନିଲାମ ପାଇଁ ସ୍ୱାଧୀନତା ପାଇଥାନ୍ତି। ଏହି କାରଣରୁ ସେଠାକାର ରେଜ୍ଟ୍ରାନ୍ସଫର୍ସ ୱେବ୍ସାଇଟରେ ସଂଖ୍ୟାଧିକ ନମ୍ବର ପ୍ଲେଟ୍ ବିକ୍ରି କିମ୍ବା ନିଲାମ ପାଇଁ ଦେଖାଯାଏ।
ୱେବ୍ସାଇଟର ଗ୍ରାହକମାନଙ୍କ ମଧ୍ୟରେ ଡେଭିଡ ବେକ୍ହାମ, ୱେନ୍ ରୁନି, ସାର୍ ଇୟାନ ବୋଥାମ ଏବଂ ବକ୍ସିଂ ତାରକା ଅମୀର ଖାନ୍ ପ୍ରମୁଖ ଅନ୍ତର୍ଭୁକ୍ତ। ଏବେ ‘ଏଫ୍୧’ ନମ୍ବର ପ୍ଲେଟ୍ର ମୂଲ୍ୟ ୧୧୦କୋଟି ଟଙ୍କା ରଖାଯାଇଥିବା ବେଳେ ୨୦ପ୍ରତିଶତ ଭ୍ୟାଟ୍ ସହ ଏହାର ମୂଲ୍ୟ ୧୩୨କୋଟି ଟଙ୍କା ହେଉଛି। ଯଦି ଏପରି ଉଚ୍ଚ ମୂଲ୍ୟରେ ଏହି ନମ୍ବର ପ୍ଲେଟ ବିକ୍ରି ହୁଏ ତେବେ ଏହା ବିଶ୍ୱର ସବୁଠାରୁ ଦାମୀ ନମ୍ବର ପ୍ଲେଟ୍ ହେବ। ପୂର୍ବରୁ ୨୦୦୮ ମସିହାରେ ଆରବର ବ୍ୟବସାୟୀ ସଇଦ ଅବ୍ଦୁଲ ଗଫୁର ଖୌରୀ ପ୍ରାୟ ୯୩କୋଟି ଟଙ୍କାରେ ଏକ ସ୍ଥାନୀୟ ନମ୍ବର ପ୍ଲେଟ୍ କିଣିଥିଲେ ଯାହାର ନମ୍ବର ଥିଲା ୧। ଦ୍ଭ
