ନୀଳଗିରି: ଜମିଜମା ଗଣ୍ଡଗୋଳକୁ କେନ୍ଦ୍ରକରି ଦାଦା-ଖୁଡ଼ିଙ୍କୁ ମରଣାନ୍ତକ ଆକ୍ରମଣ କରାଯାଇଛି। ଏହି ଅଭିଯୋଗରେ ପୁଲିସ ୨ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି।
ମିଳିଥିବା ସୂଚନା ଅନୁଯାୟୀ ନୀଳଗିରି ବାଇପାସ ଛକ ନିକଟରେ ଘର କରିଥିବା ବାଉଁଶବଣିଆ ଗାଁର ଗଦାଧର ଦାସ ଓ ତାଙ୍କ ସ୍ତ୍ରୀ କବିତାଙ୍କୁ ପୂର୍ବଶତ୍ରୁତାକୁ କେନ୍ଦ୍ରକରି ଆକ୍ରମଣ କରାଯାଇଛି। ମଙ୍ଗଳବାର ଦମ୍ପତ୍ତି ଘରେ ବସିଥିବା ସମୟରେ ପୁତୁରା ରାଜେଶ ବେହେରା, ଭବେଶ, ବଡ଼ଭାଇ ବେଣୁଧର ଓ ତାଙ୍କ ସ୍ତ୍ରୀ କମିଳା ହଠାତ ସେହି ସ୍ଥାନରେ ପହଞ୍ଚି ଅଶ୍ଳୀଳ ଭାଷାରେ ଗାଳିଗୁଲଜ ସହ ଠେଙ୍ଗା ଓ କଟୁରିରେ ଆକ୍ରମଣ କରିଥିଲେ। ଏପରିକି ପୁତୁରା ରାଜେଶ ତାଙ୍କ ଦାଦା ଗଦାଧରଙ୍କ ବେକକୁ କାମୁଡ଼ି ଛିଣ୍ଡାଇ ଦେଇଥିଲା। ସବୁଠାରୁ ବଡ଼କଥା ହେଲା, ଜମିଜମାକୁ କେନ୍ଦ୍ରକରି କିଛିଦିନ ପୂର୍ବରୁ କଟକରେ ହୋଇଥିବା ହତ୍ୟାକାଣ୍ଡ ଭଳି ନୀଳଗିରିରେ ମଧ୍ୟ ସୃଷ୍ଟି ହେବ ବୋଲି ପୁତୁରା ରାଜେଶ ଧମକ ଦେଇଥିଲା । ଧମକ ଦେବାର ୬ଦିନ ପରେ ଅର୍ଥାତ ମଙ୍ଗଳବାର ହଠାତ ଏଭଳି ମରଣାନ୍ତକ ଆକ୍ରମଣ କରାଯିବାରୁ ଦାଦା ଗଦାଧର ଗୁରୁତର ହୋଇ ନୀଳଗିରି ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସେହିପରି ଖୁଡ଼ି କବିତାଙ୍କ ହାତ ଭାଙ୍ଗିବା ସହ ଦେହର ଏକାଧିକ ସ୍ଥାନରେ କ୍ଷତ ସୃଷ୍ଟି ହୋଇଛି। ଏନେଇ ନୀଳଗିରି ଥାନାରେ ୨ଟି ଏତଲା ଦାଏର ହୋଇଛି । ପୁଲିସ ଅଭିଯୁକ୍ତ ପୁତୁରା ରାଜେଶ ଓ ତାଙ୍କ ବାପା ବେଣୁଧର ଙ୍କୁ ଗିରଫ କରି କୋର୍ଟ ଚାଲାଣ କରିଛି।
Comments are closed.