ସମ୍ବଲପୁର: ମହାପ୍ରଭୁ ଶ୍ରୀଜଗନ୍ନାଥ ଦାରୁବିଗ୍ରହରେ ଲୀଳା କରି ପାପଖଣ୍ଡନ ଓ ଆନନ୍ଦ ଦାନ ଦ୍ୱାରା ଜନ ଓ ଜଗତର କଲ୍ୟାଣ କରୁଛନ୍ତି ବୋଲି ବିଶିଷ୍ଟ ବାଗ୍ମୀ ତଥା ଶ୍ରୀଜଗନ୍ନାଥ ସଂସ୍କୃତି ଗବେଷକ ଡାକ୍ତର କୃଷ୍ଣକେଶବ ଷଡଙ୍ଗୀ କହିଛନ୍ତିି। ସାପ୍ତାହିକ ‘ସ୍ୱୀକାର’ ପକ୍ଷରୁ ସ୍ଥାନୀୟ ହୋଟେଲ ଶୀଲା ଟାୱାରରେ ଆୟୋଜିତ ତ୍ରିଦିବସୀୟ ‘ଶ୍ରୀଜଗନ୍ନାଥ କଥାମୃତ’ କାର୍ଯ୍ୟକ୍ରମର ଉଦ୍ଘାଟନ ଦିବସରେ ପ୍ରବକ୍ତା ଡା. ଷଡଙ୍ଗୀ ଶ୍ରୀଜଗନ୍ନାଥଙ୍କ ଦାରୁବିଗ୍ରହଧାରଣର ଶାସ୍ତ୍ରୀୟ ପ୍ରମାଣ ସହ ଆଲୋଚନା ରଖି ବିଜ୍ଞାନ, ଜ୍ଞାନ ଓ କର୍ମମତର ବିସ୍ତୃତ ଅବତାରଣା କରିଥିଲେ। ବୃକ୍ଷଶରୀର ଓ ମାନବୀୟ ବ୍ୟବହାର ଦ୍ୱାରା ପ୍ରକୃତରେ ମହାପ୍ରଭୁ ସ୍ୱୟଂ ଜଗତର ନାଥ ଭାବରେ ସର୍ବଜନବିଦିତ ହୋଇଛନ୍ତି। ଭକ୍ତିପୂର୍ଣ୍ଣ-ସମର୍ପଣରେ ହିଁ ସେହି ଜଗନ୍ନାଥଙ୍କୁ ଦର୍ଶନ କଲେ ପାପ ଓ ଦୁଃଖର ବିଲୟ ସହ ପରମ ଆନନ୍ଦର ପ୍ରାପ୍ତି ହୋଇଥାଏ ବୋଲି ସେ ମତ ରଖିଥିଲେ। ବିଶିଷ୍ଟ ଶିକ୍ଷାବିତ୍ ତଥା ବ୍ରହ୍ମପୁର ବିଶ୍ୱବିଦ୍ୟାଳୟର ପ୍ରାକ୍ତନ କୁଳପତି ପ୍ରଫେସର ଆଦିତ୍ୟ ପ୍ରସାଦ ପାଢ଼ୀଙ୍କ ପୌରୋହିତ୍ୟରେ ଆୟୋଜିତ ଏହି ଆଧ୍ୟାତ୍ମିକ ସଭାରେ ଗଙ୍ଗାଧର ମେହେର ବିଶ୍ୱବିଦ୍ୟାଳୟର କୁଳପତି ପ୍ରଫେସର ଏନ୍. ନାଗରାଜୁ ମୁଖ୍ୟଅତିଥି ଭାବରେ ଯୋଗଦେଇ ଶ୍ରୀଜଗନ୍ନାଥଙ୍କ ମହିମା ନିତ୍ୟ ଶ୍ରବଣୀୟ ହେଲେ ଯାଇଁ ଆମର କଲ୍ୟାଣ ହୋଇପାରିବ ବୋଲି ମତ ଦେବା ସହ ମୁଖ୍ୟବକ୍ତା ଡାକ୍ତର ଷଡଙ୍ଗୀଙ୍କ ବକ୍ତବ୍ୟର ପ୍ରଶଂସା କରିଥିଲେ। ଅଧ୍ୟାପକ ଡକ୍ଟର ଶ୍ୟାମସୁନ୍ଦର ଧର କାର୍ଯ୍ୟକ୍ରମକୁ ସଂଯୋଜିତ କରିଥିବା ବେଳେ ସ୍ୱୀକାର ସଂପାଦକ ହେମନ୍ତ କୁମାର ମହାପାତ୍ର ସ୍ୱାଗତଭାଷଣ ଓ ବରିଷ୍ଠ ଶିକ୍ଷାବିତ୍ ଅରବିନ୍ଦ ମହାପାତ୍ର ଧନ୍ୟବାଦ ଅର୍ପଣ କରିଥିଲେ। ସଭାରେ ବହୁସଂଖ୍ୟାରେ ଜଗନ୍ନାଥପ୍ରେମୀ ଯୋଗ ଦେଇ କଥାମୃତ ଶୁଣିବା ସହ ପୁରୀରୁ ଆସିଥିବା ମହାପ୍ରଭୁଙ୍କ ଶୁଖୁଲି ମହାପ୍ରସାଦ ସେବା କରିଥିଲେ। ସୂଚନାଯୋଗ୍ୟ ଯେ, ଏହି କାର୍ଯ୍ୟକ୍ରମ ଆଗାମୀ ରବିବାର ପର୍ଯ୍ୟନ୍ତ ଚାଲିବ।
Popular Categories
Previous article
Next article