ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ନବଭାରତ ଗଠନ ପାଇଁ ଏକ ସଂଖ୍ୟା ଗରିଷ୍ଠ ଓ ମଜବୁତ ସରକାର ଆବଶ୍ୟକ। ସେ କହିଛନ୍ତି, ସରକାରଙ୍କ ପାଖରେ ସଂଖ୍ୟା ଗରିଷ୍ଠତା ଥିବାରୁ ସରକାର ଦେଶର ସର୍ବାଙ୍ଗିନ ଉନ୍ନତି କରୁଛନ୍ତି। ସେ କହିଛନ୍ତି, ଉତ୍ତରପ୍ରଦେଶରୁ ନବଭାରତ ଗଠନ ଆରମ୍ଭ ହେବ। ମଙ୍ଗଳବାର ଅପରାହ୍ଣରେ ବାରାଣସୀର ରୋହାଣିଆ ଅଞ୍ଚଳ ସ୍ଥିତ ଔଢ଼େ ଗ୍ରାମରେ ଏକ ସାଧାରଣ ସଭାରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ବହୁ ସଂଖ୍ୟାରେ ବିଦ୍ୟୁତ୍, ରେଳ ଓ ସଡ଼କ ପ୍ରକଳ୍ପ ସମ୍ପୂର୍ଣ୍ଣ ହୋଇଛି ଓ ଅନେକ ପ୍ରକଳ୍ପର କାର୍ଯ୍ୟ ଜାରି ରହିଛି। ବିଗତ ସାଢ଼େ ଚାରି ବର୍ଷ ଭିତରେ ସରକାର ବିଜ୍ଞାନ ଓ ବୈଷୟିକଜ୍ଞାନର ବିକାଶରେ ଅନେକ ପଦକ୍ଷେପ ନେଇଛନ୍ତି। ବନ୍ଦେ ଭାରତ ଟ୍ରେନ୍ ଏହାର ଏକ ଉଦାହରଣ ବୋଲି ସେ କହିଛନ୍ତି। ଶ୍ରୀ ମୋଦି କହିଛନ୍ତି, ଭାରତ ବୁଲେଟ ଟ୍ରେନ୍ ନିର୍ମାଣ କରିବ ଓ ଏହାକୁ ସଫଳତାର ସହ ଚଳାଇବ। ପ୍ରଧାନମନ୍ତ୍ରୀ ତାଙ୍କର ବାରାଣସୀ ଗସ୍ତ ସମୟରେ ୩୫୦କୋଟି ଟଙ୍କା ସମ୍ବଳିତ ୪୭ଟି ବିକାଶ ମୂଳକ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ ଓ ଉଦ୍ଘାଟନ କରିଛନ୍ତି।