ମୁମ୍ୱାଇ: କମ୍ପାନୀ ପାଇଁ ମାଗଣାରେ ଖଟୁଛନ୍ତି ଭାରତର ଏକ ନମ୍ୱର ଧନୀ ମୁକେଶ ଅମ୍ୱାନୀ। ଗତବର୍ଷ କୋଭିଡ୍ ସମୟରେ ସେ ବିନା ଦରମାରେ କାମ କରିଥିବା ଚର୍ଚ୍ଚାର ବିଷୟ ପାଲଟିଥିଲା। ଚଳିତ ବର୍ଷ ମଧ୍ୟ ସେ ଦରମା ନେଉ ନାହାନ୍ତି । ରିଲାଏନ୍ସ ଇଣ୍ଡଷ୍ଟ୍ରୀଜ୍ରେ ସେ କାର୍ଯ୍ୟ କରୁଥିବା ବେଳେ ଦରମା ବାବଦକୁ ଗତ ବର୍ଷ ଗୋଟିଏ ବି ଟଙ୍କା ସେ ନେଇ ନଥିଲେ । ମହାମାରୀ କାରଣରୁ କମ୍ପାନୀ ଉପରେ ବାଣିଜ୍ୟିକ ଓ ଅର୍ଥନୈତିକ ପ୍ରଭାବ ପଡିଥିବାରୁ ସେ ବର୍ଷ ଦରମା ବାବଦ ଟଙ୍କା ନେଇନଥିବା ଆର୍ଥିକ ବର୍ଷ ୨୦୨୦-୨୧ର ବାର୍ଷିକ ରିପୋର୍ଟରୁ ଜଣାପଡ଼ିଛି।
ରିଲାଏନ୍ସର ଅଧ୍ୟକ୍ଷ ଏବଂ ପରିଚାଳନା ନିର୍ଦେଶକ ଭାବେ ସେ କାର୍ଯ୍ୟ କରୁଛନ୍ତି । ବିଶ୍ୱରେ କରୋନା ପ୍ରଭାବ ବିସ୍ତାର ସମୟରେ ଜୁନ୍ ୨୦୨୦ରେ ସେ ଆର୍ଥିକ ବର୍ଷ ୨୦୨୦-୨୧ ବର୍ଷ ପାଇଁ ଏକ ଟଙ୍କା ଦରମା ନେବେ ନାହିଁ ବୋଲି ଘୋଷଣା କରିଥିଲେ । ତେବେ ଚଳିତ ଆର୍ଥିକ ବର୍ଷ ୨୦୨୧-୨୨ ପାଇଁ ମଧ୍ୟ ସେ ବିନା ଦରମାରେ କାମ କରିଥିବା କହିଛନ୍ତି । ଗତବର୍ଷ ସେ କୌଣସି ଭତ୍ତା, ଅବସର କାଳୀନ ଭତ୍ତା, ଅନ୍ୟାନ୍ୟ ସୁବିଧା ସୁଯୋଗ ନେଇନଥିବା ବେଳେ ଚଳିତ ବର୍ଷ ମଧ୍ୟ କୌଣସି ସୁବିଧା ସୁଯୋଗ କମ୍ପାନୀଠାରୁ ନେବେ ନାହିଁ ବୋଲି କହିଛନ୍ତି । ୨୦୦୮-୦୯ରେ ମୁକେଶ ୧୫ କୋଟି ଟଙ୍କା ଦରମା ନେଉଥିବା ବେଳେ ୨୦୧୯-୨୦ ରେ ମଧ୍ୟ ସେ ସମାନ ଦରମା ନେଉଥିଲେ । ଏହାରି ସହ ଅନ୍ୟାନ୍ୟ ସୁବିଧା ମିଶାଇ ୨୪ କୋଟି ଟଙ୍କା ପ୍ରତିବର୍ଷ ସେ ନେଉଥିବା ଜଣାପଡ଼ିଛି। ତେବେ ଗତ ଦୁଇ ବର୍ଷ ହେଲା ସେ ଗୋଟିଏ ବି ଟଙ୍କା କମ୍ପାନୀଠାରୁ ନେଇ ନାହାନ୍ତି।
Comments are closed.