ନୂଆଦିଲ୍ଲୀ : ଚଳିତ ବର୍ଷ ଉତ୍ତର ଓ ଦକ୍ଷିଣ ଭାରତରେ ମୌସୁମୀ ବର୍ଷା ସ୍ବାଭାବିକ ଠାରୁ କମ୍ ହେବ ବୋଲି ଭାରତୀୟ ପାଣିପାଗ ବିଭାଗ ଶୁକ୍ରବାର ଏହାର ପୂର୍ବାନୁମାନରେ କହିଛି। ମୌସୁମୀ ବାୟୁ ଉପରେ ଏଲନିନୋର ପ୍ରଭାବ ପଡିବ ବୋଲି ଆଶଙ୍କା କରାଯାଇଛି। ବର୍ଷା ଋତୁର ଶେଷ ଭାଗକୁ ଏଲନିନୋର ପ୍ରଭାବ ହ୍ରାସ ପାଇବ ବୋଲି ଆଇଏମଡି କହିଛି।
ଆଇଏମଡିର ପୂର୍ବାନୁମାନ ଅନୁସାରେ ଜୁଲାଇରେ ମୌସୁମୀ ବର୍ଷା ସ୍ବାଭାବିକ ଠାରୁ କମ୍ ହେବ ଓ ଅଗଷ୍ଟରେ ସ୍ବାଭାବିକ ହେବ। ସର୍ବନିମ୍ନ ହାରାହାରି ବୃଷ୍ଟିପାତ (ଏଲପିଏ) ୯୦ରୁ ୯୬ ପ୍ରତିଶତ ମଧ୍ୟରେ ରହିଲେ ତାକୁ ସ୍ବାଭାବିକ ଠାରୁ କମ୍ କୁହାଯାଇଥାଏ। ଆଞ୍ଚଳିକ ଭିତ୍ତିରେ ଆଇଏମଡି ମୌସୁମୀ ବାୟୁ ସମ୍ପର୍କରେ କରିଥିବା ପୂର୍ବାନୁମାନ ଅନୁଯାୟୀ ଉତ୍ତର-ପଶ୍ଚିମ ଭାରତରେ ଏଲପିଏ ୯୪ ରହିବ। କେନ୍ଦ୍ର ଭାରତରେ ଏଲପିଏ ୧୦୦, ଉତ୍ତରପୂର୍ବ ଭାରତରେ ଏହା ୯୧ ରହିବ। ଆଇଏମଡିର ଉତ୍ତରପୂର୍ବ ଡିଭିଜନ ମଧ୍ୟରେ ପଶ୍ଚିମବଙ୍ଗ, ବିହାର, ଓଡ଼ିଶା, ଝାଡଖଣ୍ଡ ଭଳି ରାଷ୍ଟ୍ର ରହିଛି। ତେଣୁ ଓଡ଼ିଶାରେ ସ୍ବାଭାବିକ ଠାରୁ କମ୍ ବର୍ଷା ହେବାର ଆଶଙ୍କା ରହିଛି। ଚଳିତବର୍ଷ ମୌସୁମୀ ବର୍ଷା ସ୍ବାଭାବିକ ଠାରୁ ୫ଦିନ ବିଳମ୍ବରେ ଜୁନ୍ ୬ରେ କେରଳରେ ପହଞ୍ଚିବ ବୋଲି ପୂର୍ବାନୁମାନ କରାଯାଇଛି।
