ମୋହନା : ବିଦ୍ୟୁତ ତାର ଚୋରୀ ଅଭିଯୋଗରେ ଗଜପତି ଜିଲ୍ଲା ମୋହନା ପୁଲିସ ପକ୍ଷରୁ ଚଢାଉ କରାଯାଇ ୩ ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ମାଣିକପୁର ପଞ୍ଚାୟତ ଗୋବିନ୍ଦପୁର ଗାଁର ନାରାୟଣ କାର୍ଯୀ, ନିରଞ୍ଜନ ମଲ୍ଲିକ ଓ ଚାନ୍ଦିୁପୁଟର ସୁରେନ୍ଦ୍ର ଗୌଡ। ସେମାନଙ୍କଠାରୁ ୧୨ ଶହ ମିଟର ୩୩ କେଭି ବିଦ୍ୟୁତ ତାର ଓ ଗୋଟିଏ ଅଟୋ ଜବତ କରାଯାଇଥିବା ମୋହନା ଥାନା ଅଧିକାରୀ ପ୍ରଶାନ୍ତ ବେହେରା କହିଛନ୍ତି।
ପୁଲିସ ସୁତ୍ରରୁ ବମିଳିଥିବା ସୂଚନା ଅନୁସାରେ, ଗତ ଅଗଷ୍ଟ ୧୬ରୁ ଚାନ୍ଦିପୁଟ କଲେଜ ନିକଟରେ ୧୨ ଶହ ମିଟରରୁ ଅଧିକ ୩୩ କେଭି ବିଦ୍ୟୁତ ତାର ଚୋରି ହୋଇଥିବା ଅଭିଯୋଗ ଆସିଥିଲା। ଏହାପରେ ଥାନାରେ ଏକ ମାମଲା ରୁଜୁକରାଯାଇ ତଦନ୍ତ ଚାଲିଥିଲା। ଶୁକ୍ରବାର ଭୋର ସମୟରେ ଏଏସଆଇ କାମରାଜୁ ରେଡୀଙ୍କ ନେତୃତ୍ୱରେ ଚାନ୍ଦିପୁଟ ଅଞ୍ଚଳରେ ପୁଲିସ ପକ୍ଷରୁ ପେଟ୍ରୋଲିଂ ଚାଲିଥିବା ବେଳେ ଏକ ଅଟୋ ନଂ ଏପି ୩୦ ୟାଇ ୨୪୦୨ ଗାଡିକୁ ଯାଞ୍ଚ କରିଥିଲେ। ଏଥିରେ ବିପୁଳ ପରିମାଣର ବିଦ୍ୟୁତ ତାର ଭର୍ତ୍ତି ହୋଇଥିବା ଦେଖି ତଦନ୍ତ କରିଥିଲେ। ତଦନ୍ତରୁ ଜଣାପଡିଥିଲା ଯେ ଗତ ଅଗଷ୍ଟରେ ଚୋରି ହୋଇଥିବା ବିଦ୍ୟୁତ ତାରକୁ ଉକ୍ତ ୩ ଜଣ ଅଟୋରେ ଗୋବିନ୍ଦପୁର ନେଉଥିଲେ। ଶୁକ୍ରବାର ସେମାନଙ୍କୁ କୋର୍ଟ ଚାଲାଣ କରାଯାଉଥିବା ଥାନା ଅଧିକାରୀ କହିଛନ୍ତି।
