ବିଶ୍ୱନାଥପୁରଠାରେ ମୋ ସ୍କୁଲ ଅଭିଯାନ ଓ ଲିଭୋଲିଙ୍କ ଫାଉଣ୍ଡେସନର ମିଳିତ ବୈଠକ

ଲାଞ୍ଜିଗଡ: ମୋ ସ୍କୁଲ ଅଭିଯାନ ଓ ସ୍ୱେଚ୍ଛାସେବୀ ସଂଗଠନ ଲିଭୋଲିଙ୍କର ମିଳିତ ଆୟୋଜନରେ ଆଜି ଲାଞ୍ଜିଗଡ ବ୍ଲକ ମୁଖ୍ୟାଳୟ ବିଶ୍ୱନାଥପୁରସ୍ଥିତ ବ୍ଲକ କନଫରେନ୍ସ ହଲଠାରେ ଏକ ସ୍ୱତନ୍ତ୍ର ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ମୋ ସ୍କୁଲ ଅଭିଯାନର ରାଜ୍ୟ ସମନ୍ୱୟ ସଂଯୋଜକ ସନ୍ତୋଷ ପାତ୍ର ମୁଖ୍ୟ ଅତିଥି ଭାବେ ଯୋଗ ଦେଇଥିବାବେଳେ ସମ୍ମାନିତ ଅତିଥି ଭାବେ ବନ୍ଧପାରି ସିଆରସିସି ତ୍ରିନାଥ ନାଏକ, କାନକୁଟ୍ରୁ ସିଆରସିସି ଗୌରବ ନାୟକ, ଲିଭୋଲିଙ୍କ ଫାଉଣ୍ଡେସନର ରାଜେଶ କୁମାର ମଲ୍ଲିକ ପ୍ରମୁଖ ଯୋଗ ଦେଇଥିଲେ। ଲିଭୋଲିଙ୍କ ଫାଉଣ୍ଡେସନର ପ୍ରକଳ୍ପ ପରିଚାଳକ ସନ୍ତୋଷ କୁମାର ଦାସ କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିଲେ। ଏହି ଅବସରରେ ଲିଭୋଲିଙ୍କ ଫାଉଣ୍ଡେସନ ତରଫରୁ ବ୍ଲକର ସିନ୍ଧିପଦର, ବରଟି, ଲଡାଙ୍ଗ, ଦୋରାସାର୍ଲି, ବେନଗାଁ, ପେଙ୍ଗସୁର, ଲୁମାଗାଁ, ପୁନିଗୁଡା, ଟିମନବାଡି, ବଚକା, ପାଇକବୋରି, କାନକୁଟ୍ରୁ, ତାଲବୋରା, ତଳକାଲିମା ଆଦି ୧୪ଟି ସ୍କୁଲରେ ପାଠାଗାର ସ୍ଥାପନ ପାଇଁ ଆର୍ଥିକ ସହାୟତା ଘୋଷଣା କରାଯାଇଥିଲା। ତେବେ ପ୍ରତି ସ୍କୁଲ ପାଇଁ ଫାଉଣ୍ଡେସନ ପକ୍ଷରୁ ୩୨ ହଜାର ଟଙ୍କାର ଆର୍ଥିକ ସହାୟତା ମିଳିବାକୁ ଥିବାବେଳେ ମୋ ସ୍କୁଲ ଅଭିଯାନରେ ଏହି ଅର୍ଥରାଶି ତିନିଗୁଣ ହୋଇଯିବ ଏବଂ ସେଇ ଅର୍ଥରାଶିରେ ସଂପୃକ୍ତ ସ୍କୁଲଗୁଡିକରେ ପାଠାଗାର ଖୋଲାଯିବ ବୋଲି ଜଣାପଡିଛି। ଆଜିର କାର୍ଯ୍ୟକ୍ରମରେ ୧୪ଟି ସ୍କୁଲର ଶିକ୍ଷକ, ଶିକ୍ଷୟିତ୍ରୀମାନେ ଯୋଗ ଦେଇଥିବାବେଳେ ଫାଉଣ୍ଡେସନର ମଳୟ, ସୋମନାଥ ଓ ସହଦେବ କାର୍ଯ୍ୟକ୍ରମ ପରିଚାଳନା କରିଥିଲେ।